An engem Theater am Norden vu Paräis hunn eng 30 Regierungsgéigner versicht, mat Gewalt an d'Gebai ze kommen.

De Grond: De franséische President Emmanuel Macron souz hei mat senger Fra Brigitte Macron an enger Virféierung.

E Journalist, deen e puer Reien hannert dem President souz, hat eng Foto getwittert, op där een den Emmanuel Macron gesinn konnt. Der Police no konnten d'Demonstranten awer dru gehënnert ginn, an den Theater eranzegoen. De Journalist, deen d'Foto getwittert huet, gouf nach an der Nuecht festgeholl.

No méi wéi 6 Woche Streik géint d'Rentereform ass d'Stëmmung an Frankräich weiderhin ugespaant. Och d'Onrouen am Theater hu sech géint déi geplangte Reform vum President Macron geriicht.

Vun e Méindeg un sollen 12 vun den Paräisser Metroslinnen awer gréisstendeels nees normal fueren, dat huet d'Gewerkschaft UNSA matgedeelt. UNSA seet sech awer ëmmer nach "decidéiert, de Kampf weiderzeféieren". Fir de 24. Januar sinn nees gréisser Streik-Aktiounen géint déi geplangte Rentereform geplangt. Op dësem Dag soll de Gesetzprojet am Ministerrot deposéiert ginn.