Zënter der leschter Woch ginn awer Otemschutzmaske massiv an den Apdikte gefrot, ma et sinn zu Lëtzebuerg quasi keng méi ze kréien.

Am Ufank ware se virun allem bei den Touriste gefrot. Fir genee ze sinn, bei asiateschen Touristen, wéi den Alain de Bourcy weess. Als President vum Syndikat vun den Apdikter steet hien a Kontakt mat senge Kolleegen aus dem ganze Land. Otemschutzmasken wiere bal néierens méi op Stock.

"Et ass iwwerall d'selwecht. Et huet quasi kee méi Masken do. Ech hunn elo selwer gekuckt, fir eng gewëss Quantitéit vun deene Masken ze kréien. Ech krut elo gesot, ech kréich e Freiden eventuell eng bis dräi Këschten, also domadder laaft der net wäit. "

Dat sinn ongeféier 50 Masken am Ganzen, präziséiert den Alain de Bourcy a betount, datt e sech och net wëll op d'Aussoe vun de Fournisseure verloossen, bis en d'Maske wierklech am Grapp huet. Se dierften och séier ausverkaaft sinn, well an Tëschenzäit si se net méi just bei Touristë gefrot.

"Zënter gewosst ass, datt et dräi Fäll a Frankräich an och een an Däitschland gëtt, si se och bei de Leit heiheem gefrot. Mir haten e Sonndeg Déngscht, Moies Punkt 8 Auer stoung e Client do, deen no Maske gefrot huet."

Wann ee vun Otemschutzmaske schwätzt, muss een och präziséieren, datt et net egal ass, wéi eng ee benotzt. Do ginn et verschidde Schutznormen.

"Déi Norm, ass d'Norm FFP2, déi et anscheinend minimum muss sinn an déi Maske si méi deier. Eng Këscht mat 20 Stéck kascht ëm déi 50 Euro an déi ginn normalerweis net gefrot a si meeschtens och net op Stock an den Apdikten. Dat sinn net déi Otemschutzmasken, wéi mir se kennen wéi den Zänndokter unhuet oder déi der mol kaaft, wann der Iech erkaalt hutt an dir hutt eng eeler Persoun oder e klengt Kand doheem, déi der net wéilt ustiechen. Et sinn also net déi gängeg Masken. De Mundschutz, wéi et op däitsch heescht."

Déi Masken, déi der Norm entspriechen, filtere méi a loossen deemno manner oder keng Partikele méi duerch. Si sinn ebe just den Ament schwéier ze kréien. A Frankräich an och an Däitschland ass d'Situatioun d'selwecht wéi zu Lëtzebuerg.

Éischten Infizéierten an Däitschland hat sech bei Chineesin ugestach, 3 weider Fäll en Dënschdeg confirméiert

Bal 6000 Fäll vu Virus-Erkrankunge gëtt et aktuell a China. A Bayern dogéint gouf an der Nuecht op en Dënschdeg den éischte Fall an Däitschland bekannt.

E Mataarbechter aus der Firma "Webasto" huet sech bei enger Fra aus China ugestach, déi den 19. Januar fir Formatiounen ugereest war. Si hat en Openthalt vu 4 Deeg. Och si hat sech no hirer Heemrees krank gefillt. Kuerz nodeems de Corona-Virus festgestallt gouf, huet "Webasto" d'Santé informéiert.

D'Formatioun wier lescht Woch en Dënschdeg gewiescht, de Weekend hätt de Mann sech net gutt gespiert a Symptomer vun enger Bronchite gewisen. Well hie sech méindes nees besser gefillt hat, wier en och nees schaffe gaangen.

Wéi den zoustännege President, Andreas Zapf, en Dënschdeg de Moien op enger Pressekonferenz confirméiert huet, handelt et sech beim Patient an Däitschland ëm e Mann vun 33 Joer. Hie wier an engem gudde gesondheetlechen Zoustand a bis op Weideres isoléiert. Traitementer wieren net méi néideg, de Mann am Spidol ze halen, wier eng reng Virsiichtsmoossnam.

Sämtlech Mataarbechter, déi mat de Concernéierten a Kontakt waren, stinn ënner Kontroll. Och am direkten Ëmfeld vum Mann, respektiv d'Spillschoul, an deem seng Kanner sinn, stinn ënner Beobachtung.

En Dënschdeg den Owend koum dunn d'Noriicht, dass et dräi weider Fäll ginn, wou Leit sech mam neie Corona-Virus infizéiert hunn. D’Persoune hätten am direkte Kontakt gestanen, mam éischte Fall vun der Longekrankheet, deen e Méindeg den Owend annoncéiert gouf. 40 weider Mataarbechter stinn ënnert besonnescher Kontroll, fir eng Infektioun fréi z'erkennen. Déi 4 Infektiounen an Däitschland sinn a Bayern detektéiert ginn.

D'Firma a Bayern, an där d'Infektioune geschitt sinn, gouf en Dënschdeg dem Owend mol fir dem Ament zougemaach.

Zuel vun Doudesaffer klëmmt

D’Zuel vun infizéierte Leit mam neie Corona-Virus a China ass elo offiziell méi héich, wéi an de Joren 2002 an 2003 um ominéise SARS-Virus. Zanter en Dënschdeg wieren 1400 nei confirméiert Fäll derbäi komm, sou dass momentan vun 5974 Krankheetsfäll a China rieds geet, bei 132 Doudegen.

D'WHO warnt trotz allem virun enger Panik. De WHO-Generalsekretär Tedros Adhanom Ghebreyesus sot, hie wier zouversiichtlech, dass China e weidert ausbreede kontrolléiert kritt an de Virus andämmt.

De britteschen Ausseministère recommandéiert senge brittesche Bierger net a China ze reesen, wann et net onbedéngt muss sinn. Dat wéinst dem Corona-Virus, deen do ausgebrach ass. D’Warnung gëllt awer net fir Hongkong a Macau.