Nom presuméierte Rietsextremen Attentat an der Nuecht op en Donneschdeg zu Hanau, waren en Donneschdeg Dausende Mënschen a ganz Däitschland op der Strooss.

Eleng zu Hanau, eng Stad bei Frankfurt am Main, hunn der Police no 5.000 Mënschen protestéiert. Och de Bundespresident Frank-Walter Steinmeier war op Hanau gereest an huet virun den Demonstrante geschwat. Hien huet un de gesellschaftlechen Zesummenhalt an un den Zivilcourage appelléiert: "Wir stehen als Gesellschaft zusammen, wir lassen uns nicht einschüchtern, wir laufen nicht auseinander." Dem Bundespresident no goufen et an iwwer 50 däitsche Stied Manifestatiounen.

No der Attack vun Hanau huet den däitschen Inneminister Horst Seehofer annoncéiert, datt d'Policepresenz a ganz Däitschland eropgesat gëtt, fir d'Leit ze protegéieren. Ënnert anerem solle Moscheeë besser geschützt ginn. D'Police soll och verstäerkt op Garen, Fluchhäfen a laanscht d'Grenze Presenz weisen. D'Dot zu Hanau wier iwwerdeems eendeiteg rassistesch motivéiert, sot den Horst Seehofer. Et wier déi drëtt Attack vun där Zort bannent wéinege Méint.