Als Reaktioun op déi zwee rezent Doudesfäll an Italien goufen an 10 Stied d'Schoulen, d'Verwaltungen an aner ëffentlech Gebaier zougemaach.

An Italien ass deen éischten Europäer um neie Coronavirus gestuerwen. Beim Affer handelt et sech ëm en Italiener vun 78 Joer, dee positiv op de Virus getest gi war, dat huet den italieneschen Gesondheetsminister offiziell matgedeelt. De Mann wier virun 10 Deeg wéinst enger anerer Krankheet an engem Spidol an der Regioun Venetien behandelt ginn. Do haten d'Autoritéite virdrun zwee Corona-Fäll entdeckt.

An der Lombardei gëtt et bis ewell 15 Fäll. Och do soll e Samschdeg eng Italienerin un de Suitte vum Coronavirus gestuerwe sinn. Als Reaktioun op d'Doudesfäll goufen an 10 Stied an der Lombardei mat effet immédiat Schoulen, Verwaltungen an aner ëffentlech Gebaier zougemaach. Och Supermarchéen, Caféen, Diskoen a Sportshale musse fir op d'mannst eng Woch zoubleiwen. Vun dëse Mesure sinn am ganze 50.000 Leit betraff.

Béid Fäll ginn als Coronavirus-Doudesfäll consideréiert, och wann en éischte positiven Test nach net definitiv confirméiert ass.

E Sonndeg ass och elo eng drëtt Persoun gestuerwen, bei där de Virus nogewise gouf. Eng Fra vun 78 Joer, déi kriibskrank war, ass an der Lombardei gestuerwen. Den Ament kann een awer nach net soen, ob d'Longekrankheet effektiv d'Doudesursaach war.

A China selwer bleift d'Provënz Hubei nach ëmmer am stäerkste vum Coronavirus betraff. Besonnesch Suerge mécht den Experten awer d'Lag a Südkorea. Hei hu sech erstaunlech vill Leit nei mam Coronavirus ugestach. Eleng e Freideg goufen 142 Neiinfektioune gemellt.