Katastrophemedeziner aus Däitschland schwätze vun dramateschen Zoustänn a Spideeler am Elsass. Verschidden Aussoe goufen awer elo dementéiert.

Ënnert anerem géife Medezinner an der Universitéitsklinik zu Stroossbuerg och dann nach mat Corona-Patiente schaffen, wa se selwer infizéiert wieren, esou Mataarbechter vum däitschen Institut fir Katastrophemedeziner zu Tübingen an engem neie Bericht.

Wéi ntv schreift, gëtt am Rapport vun enger "gräifbarer Gefor duerch de Virus" geschwat, nodeems d'Medezinner aus Däitschland op der Plaz zu Stroossbuerg waren. Dohier wier och eng optimal Virbereedung an Däitschland essentiell wichteg, heescht et weider.

Zënter dem Weekend géife Patienten, déi iwwer 80 Joer al wieren, net méi zu Stroossbuerg beotemt ginn, ma se géifen amplaz Stierfbegleedung Opiater a Schlofmëttel kréien, sou Medezinner, déi op der Plaz waren. Änlech gëtt och mat Patienten aus Altersheemer verfuer.

Dës Feststellunge vun de Medezinner vum "Deutsches Institut für Katastrophenmedizin" gouf awer en Donneschdeg den Owend vun der Unisklinik Stroossbuerg dementéiert. Den Alter eleng ass kee Krittär, ob e Patient nach soll reaniméiert an un en Otemgerät ugeschloss ginn oder net, esou de Generaldirekter vun der Klinick Christophe Gautier. Et géif ee sech hei un d'Krittäre vun Experten halen, déi extra fir de Fall vum Covid-19 opgestallt goufen.

Och géif kee Personal méi schaffen, datt sech infizéiert hätt. Beim Optriede vun den éischte Symptomer géif d'Personal ofgezu ginn. Gi se dann nach positiv getest, esou bleiwe si doheem. Aktuell hätt een 280 där Fäll, déi net méi dierfte schaffe kommen.