An den USA klammen d'Zuelen däitlech. Zu New York ass ee komplett iwwerfuerdert. Spuenien huet iwwerdeems scho méi Doudeger wéi China.

Italien ass weider dat Land, dat am meeschte vum Coronavirus getraff ass. D'Zuele klamme weider, mä manner wéi den Dag virdrun. 683 Doudeger koumen derbäi. Iwwer 7.500 Persounen hunn de Virus an Italien bis ewell net iwwerlieft. Dobäi solle iwwer 9.300 Leit nees komplett geheelt sinn. Och de Süde vum Land fäert, datt d'Situatioun do an den nächsten 10 Deeg dramatesch explodéiert.

A Spuenien klëmmt d'Zuel vun Doudesaffer dramatesch un. Bannent engem Dag ass d'Zuel vun 3.434 Doudegen op 4.089 geklommen, ganz geheelt sinn eng 7.000 Leit. D'Zuel vun de positiv-geteste Persounen ass vu 47.610 op 56.188 geklommen. Eleng an der Regioun Madrid sinn elo schonn 2.090 Leit gestuerwen, a Katalounien 672.

Spuenien huet domadder méi Doudeger wéi China. Speziell an den Altersheemer sinn d'Zoustänn dramatesch. Wéinst der Coronakris mussen d'Awunner an den Heemer dacks ouni Fleeger eens ginn, si ganz op sech eleng gestallt. D'Fleegepersonal ass krank ginn an huet Altersheemer verlooss.

A Frankräich ginn et iwwerdeems iwwer 25.000 confirméiert Infektiounen. 1.331 Mënsche si gestuerwen, 3.900 nees gesond. Iwwer 11.000 Persoune leien a franséische Spideeler, 2.800 dovunner op der Intensivstatioun. En Drëttel vun de Patienten an de Spideeler wär méi jonk wéi 60 Joer, esou franséisch Autoritéiten.

De President Macron huet e Mëttwoch Mulhouse besicht, den nationalen Epizenter. Hien huet eng Militär-Aktioun annoncéiert, am „Krich“ wéi hie jo seet, géint de Coronavirus. Der Populatioun soll gehollef ginn. Patienten an de franséischen Iwwerséi-Gebidder sollen transportéiert ginn. An et soll massiv an de Gesondheetssekteur, an déi franséisch Spideeler investéiert ginn.

An Däitschland si bis ewell iwwer 37.000 Fäll registréiert ginn. 206 Mënsche si gestuerwen.

A Groussbritannien ass d'Zuel vun den Doudesaffer op 465 geklommen. Dat sinn der 28 méi wéi am leschte Bilan.

An den USA klammen d'Zuelen däitlech. Iwwer 70.000 Fäll gëtt et elo mëttlerweil. Et gëtt elo och méi getest. Ronn 1.050 Persounen hunn de Virus net iwwerlieft. An 13 Bundesstaaten an den USA läit d'Zuele vun den Infizéierten elo bei iwwer 1.000 Persounen.

Et wär apokalyptesch, heescht et zu New York. D'Spideeler do wären iwwerfuerdert. An engem Spidol wiere bannent 24 Stonnen 13 Patiente um Covid-19 gestuerwen. New York baut eng provisoresch Läichenhal.

Den amerikanesche Senat huet en risegt Nouthëllef-Gesetz gestëmmt vun 2.000 Milliarden Dollar, de gréisste Rettungspak an der US-Geschicht.

Russland stoppt de Fluchverkéier an d'Ausland, dat vun e Freideg un, esou déi russesch Regierung. Ausname si Flich, déi Russen zeréck an hir Heemescht zeréckfléien, heescht et säitens der Regierung. Flich, déi am Land sinn, bleiwen dogéint erlaabt.

D'Länner hunn deels verschidde Strategien fir der Kris ze begéinen. Rumänien wëll elo all d'Awunner an de Ballungszenteren testen. Zum Beispill, déi ganz Populatioun zu Bukarest. Mobil Ekippe solle vun Haus zu Haus goen. Dofir ginn awer Millioune vun Tester gebraucht, déi nach net do sinn. Risikogruppe solle fir d'éischt getest ginn.

Apple huet ronn 10 Milliounen Otemschutzmasken organiséiert a spent dës elo den US-amerikanesche Medezinner. E puer Millioune weider Maske si fir besonnesch schwéier Regiounen an Europa virgesinn, esou de Chef Tim Cook. Apple koordinéiert dës Aktioun dann och mat de lokale Regierungen.