Fir eng Stonn war et op ville Plaz stackdäischter, domadder wollt een en Zeeche fir eise Planéit setzen.

Mat der "Stonn vun der Äerd" wëll WWF, zesumme mat nach vill aneren Organisatiounen, en Zeeche setzen. Zesumme mat der Populatioun wollt een Drock op déi politesch Féierunge setzen, datt si endlech a punkto Klimaschutz reagéieren.

Et ass wichteg, sou schreift WWF Däitschland, datt een d'Erhëtze vun der Äerd op maximal 1,5 Grad Celsius ka begrenzen, well soss kéint dëse Klimawandel grav Konsequenzen fir d'Äerd, awer och fir d'Mënschheet hunn. D'Déiereschutzorganisatioun rechent, datt, sollt een d'Erhëtzen net an de Grëff kréien, ronn all sechste Spezies op der Äerd wäert ausstierwen.

Fir e Samschdegowend war et dann och den Opruff un alleguerten d'Leit, fir um 20.30 Auer sämtlech Luuchte fir eng Stonn auszemaachen.

Déi éischten Earth Hour gouf iwwregens 2007 vu WWF Australien an d'Liewe geruff an war hei geduecht, fir géint den onnëtz héije Stroumverbrauch ze demonstréieren. Ee Joer méi spéit war et schonn eng weltwäit Aktioun bei där ronn 100 Millioune Leit matgemaach hunn. D'lescht Joer war d'Earth Hour den 30. Mäerz a Leit aus 180 Länner op der Welt hunn drun deelgeholl.

Impressioune vun dësem Joer

Déi berüümten Oper vu Sydney an Australien. / © AFP

Den Äifel Tuerm zu Paräis. / © AFP

Vill Leit hu Käerze mat engem däitlecher Message ugefaangen. / © AFP