Wärend dem Faaschtemount däerfen déi Gleeweg vu Sonnenopgank bis Sonnenënnergang net iessen an net drénken. Och net matten an der Corona-Pandemie.

Versammlungs- a Kontaktverbuet, de Coronavirus huet Suitte fir vill reliéis Evenementer, dat gëllt och fir déi islamesch Communautéit. An den hellege Stied Mekka a Medina, wou all Dag Millioune Moslemen openeentreffen, ass et zanter Woche roueg. Moscheeë sinn zou a bleiwen et och wärend dem Ramadan.

Vill Gleeweger wëllen un hirem Fest festhalen, och a Corona-Kris ass hinnen de Faaschtemount helleg. Dat si bis zu 18 Stonnen, wou ee soll enthalsam liewen, owes gëtt giess, gefeiert a gebiet. Zu normalen Zäiten. Dëst Joer ass et anescht.

Am Noen Osten gëtt et eng strikt Ausgangsspär an der Nuecht. An Ägypten, Saudi-Arabien, Kuwait, Tunesien a Marokko gouf dës souguer ausdrécklech verlängert.

Ronn 1,6 Milliarde Mosleme sinn theoretesch opgeruff, sech un de Ramadan an och un d'Reegelen ze halen. Wéi vill der et tatsächlech maachen, ass net genee gewosst. Hei am Land liewen tëscht 18.000 an 20.000 Moslemen.

D'Faaschten am Ramadan zielt als eng vun de 5 Saile vum Islam zu de Grondflichte vun de Gleewegen.

Ramadan och zu Lëtzebuerg

E Freideg fänkt de Ramadan och fir d'Lëtzebuerger moslemesch Communautéit un, matten am Etat de crise an natierlech ënnert de Precautiounen, déi wéinst der Coronavirus-Pandemie musse geholl ginn.

Ramadan a Corona-Zäiten / De Reportage vum Claude Zeimetz

All kollektiv Elementer, d'Zesummekomme fir ze bieden an d'Faaschtebrieche mat der grousser Famill an den Nopere falen dëst Joer ewech. Social distancing oblige, dowéinst bleiwen och wärend dem Ramadan déi 9 Moscheeën a Gebietsraim hei am Land zou. Déi moslemesch Communautéit huet missen nei Weeër sichen, fir hir 20.000 Memberen innovativ duerch de Faaschtemount ze begleeden.
An dat geet  zum Beispill iwwert de Facebook-Site vun der Shoura, wou all d'Gebieder digital zelebréiert ginn. An och d' Imamen uechtert d'Land suergen derfir, datt d'Gebiet trotz Covid-19 bei d'Leit kënnt, seet d'Saima Mehonic vum Centre islamique du Nord vu Wolz.

"Et si Gebieder, déi iwwert den Internet lafen, Priedegten an d'Koranschoul fir d'Kanner, déi sonndes normalerweis an der Moschee ass, déi iwwert déi sozial Medie lafen."

D'Faaschtebriechen, wann d'Sonn ënnergaangen ass, dat owes a Gruppen mat den Noperen zum Beispill wärend engem Iessen zelebréiert gëtt, gëtt natierlech och net praktizéiert. Dat wier fir vill Leit schwiereg, seet d'Saima Mehonic, well vill Persounen op dës Hëllef, op d'Iessen ugewise sinn. Déi dierft een net vergiessen. De Ramadan hätt och e psychologeschen a soziale Volet:

"Mir haten dem Centre islamique du Nord ugebueden, de Leit kënnen ënnert d'Äerm ze gräifen, fir akafen ze goen an ech denke mer, datt och vun de Moscheeën aus, organiséiert kéint ginn, datt verschidde Familljen, déi d'Méiglechkeet hunn, e bëssche méi Iesse preparéieren an dann "Iftar to go" kéint stattfannen."

Grondsätzlech gesäit d'Weltgesondheetsorganisatioun kee gesondheetleche Risiko fir gesond Persounen a Corona-Zäiten ze faaschten. Bis ewell géif et keng Etüd, déi e Lien tëscht dem Faaschten an dem Risiko, sech unzestiechen gesäit, heescht et an enger rezenter offizieller Nott.

"Leit, déi reesen, schwanger Fraen, Fraen, déi nieren, mussen zum aktuelle Punkt kee Ramadan maachen, mä kënnen deen nohuelen. Ech ka mer awer virstellen, datt manner Leit den Ament de Ramadan maachen."

D'Limitatiounen duerch d'Corona-Pandemie kéinten dem Saima Mehonic no och duerchaus eppes positiv hunn. D'Moslemen hätten vläicht déi eemoleg Chance, dëse Ramadan ganz fir sech eleng, respektiv am enke Familljekrees ouni vill Hektik unzegoen an dat ganz bewosst liewen.

Sou laang d'Versammlungen hei zu Lëtzebuerg verbuede bleiwen, ass och un e gemeinsaamt Fest um Ofschloss vum Ramadan, dat sougenannt Fest vum Faaschtebriechen Eid al-Fitr net ze denken. Wéi gesot bleiwen d'Moscheeën an d'Gebietsraim einstweilen jo och zou.

Schreiwes vum Centre Culturel Islamique - Luxembourg

Chers frères et sœurs en Islam,

Le comité du CCIL tient à vous informer que pour cause du Covid-19 et l’état de crise dans lequel nous nous trouvons au Grand-Duché du Luxembourg, nous ne pourrons pas pratiquer notre culte et nos adorations au sein des mosquées de la manière dont l’exige l’Islam dans les circonstances habituelles comme les prières, les conférences, les iftars etc…

Cette année on devra probablement passer le Ramadan à la maison et en famille proche, ce qui ne nous empêche pourtant pas de se rapprocher d’Allah avec nos adorations, (jeûne, prières, lectures du Coran, aumônes, contact téléphonique avec la famille etc…

Si les portes des mosquées resteront fermées, les portes de la miséricorde d’Allah restent toujours grandes ouvertes.

Nous invoquons Allah et l’implorons qu’il nous préserve tous durant cette épreuve et qu’il fasse qu’on en sorte comme des meilleurs croyants.

Amine

WHO gesäit keng Problemer

Grondsätzlech si krank Leit a Leit, déi reesen vun der Faaschteflicht am Ramadan ausgeschloss. Dass déi Gleeweg elo zu Corona-Zäiten faaschten, gesäit d'Weltgesondheetsorganisatioun als net problematesch:

"Gesond Mënsche sollten an der Lag sinn ze faaschten, wéi si et och virdru gemaach hunn. Et ginn zum aktuellen Zäitpunkt keng Etüden iwwert d'Faaschten an dem Risk vun enger Infektioun."