Am Saarland kënne vun e Méindeg un alleguer d'Geschäfter, onofhängeg vun der Gréisst an dem Sortiment, erëm opmaachen.

Dat huet de Ministerpresident Tobias Hans e Samschdeg zu Saarbrécken annoncéiert.

Bis elo hu just Geschäfter mat bis zu 800 Metercarré dierften ophunn.
Den CDU-Politiker huet betount, datt et elo wichteg wier, all d'Hygièneskonditiounen ze respektéieren. Pro 20 Meter Carré dierf just ee Client an engem Buttek sinn.

D'Saarland huet e Samschdeg och decidéiert, datt vun e Méindeg un  d'Muséeën, d'Zooen, d'Fräizäit- an Déiereparken erëm opginn.

D'Coifferen an d'Schéinheetssalonen dierfen och erëm schaffen a mat der Gastronomie soll bis Enn dës Mounts e Konzept ausgeschafft ginn, fir erëm opzemaachen.

Den Tobias Hans huet awer och kloergestallt, datt weider Restriktiounen néideg sinn, fir d'Pandemie weider ënner Kontroll ze halen.

Um Sonndeg ass et d'Nouvelle, dass och Schleswig-Holstein d'Butteker nees opmécht, dat allerdéngs eréischt vum nächste Samschdeg un.