An de leschte 24 Stonne sinn der Weltgesondheetsorganisatioun (WHO) no 106.000 nei Fäll gemellt ginn.

106.000 Fäll a 24 Stonne goufen der WHO gemellt, dat wier déi héchsten Zuel zënter dem Ufank vun der Epidemie, sou de WHO-Chef Tedros Adhanom Ghebreyesus.

Et gëtt virun allem bei der Organisatioun gefaart, dass aarm Länner massiv vun der Covid-19-Pandemie kéinte betraff ginn. Et hätt een nach e laange Wee viru sech, sou de Chef vun der WHO weider. Et ass een extrem besuergt iwwert déi klammend Zuelen a Länner mat niddregem oder mëttlerem Akommes, heescht et weider.

De Gesondheetssystem an deene Länner ass schwaach oder deelweis guer net existent, noutwendeg Mesuren, wéi d'Distanzreegel wier just schwiereg ëmzesetzen.

Bal Zweedrëttel vun de Fäll gouf et an nëmme 4 Länner: USA, Russland, Brasilien a Saudi-Arabien. Duerno kommen Indien, de Peru an de Katar. Weltwäits si bis ewell méi wéi 325.000 Persounen um Sars-Cov 2 gestuerwen.