De Stuerm gëllt als dee schlëmmsten Zyklon vum bengaleschem Golf am 21. Joerhonnert.

Wéinst dem Wierbelstuerm "Amphan" sinn an Indien a Bangladesch op mannst 95 Mënschen ëm d'Liewe komm heescht et vun offizieller Säit. De Stuerm gëllt als dee schlëmmsten Zyklon vum bengaleschem Golf am 21. Joerhonnert. D'Naturkatastroph hätt ronn 10 Millioune Leit getraff, sou de Büro vun de Vereenten Natiounen am Bangladesch.

© Afp/Gal ROMA

Iwwer 3 Millioune Mënsche konnten nach evakuéiert ginn, iert de Stuerm d'Festland areecht hat. De ville Reen an de Wand mat enger Vitesse vun 160 Kilometer an der Stonn hu vill futti gemaach. Och déi héich Welle vum Mier huet vill Haiser an Dierfer iwwerschwemmt. Och wann d'Zuel vun Doudesaffer duerch déi fréizäiteg Evakuatioun relativ a Grenze gehale konnt ginn, ass de materielle Schued wuel enorm: Honnerten Dierfer goufen iwwerschwemmt, landwirtschaftlech Kulture verluer an d'Haiser vun 500.000 Mënsche goufen zerstéiert.

© Afp/Munir uz Zaman

Elo gëtt awer och gefaart, datt de Coronavirus sech méi séier verbreet, well d'Leit op klengem Raum an Nout-Strukturen ënnerbruecht sinn.

Den Zyklon Amphan huet eng Schneis vun der Zerstéierung hannerlooss. Elo geet et drëms fir op der Plaz opzeraumen. Den indesche Premier Narendra Modi soll sech um Freideg aus der Loft e Bild vun der Situatioun maachen. Dausenden Haiser goufe vum Stuerm mat ewechgerappt an et gëtt nach kee Stroum op ville Plazen. Et dauert wuel nach Deeg bis déi ganz Envergure vun der Zerstéierung ze gesinn ass.