D'Rentabilitéit an der ugeschloener Fligerei géif sou weider erofgoen an d'Ticketspräisser klammen, esou d'IATA.

D'Fluchgesellschafte si géint d'Propositioune vun der EU iwwert d'Distanzreegelen am Fliger. D'IATA, déi international Associatioun vum Aviatiounssecteur, déi 290 Airlinne regroupéiert, huet sech en Donneschdeg géint de "social distancing" u Bord ausgeschwat. Doduerch géing d'Rentabilitéit an der ugeschloener Fligerei weider erofgoen an d'Ticketspräisser klammen.

D'EU hat um Donneschdeg Richtlinne fir Fluchreese wärend der Corona-Pandemie eraus ginn. Passagéier a Fluchpersonal musse Masken undoen, heescht et vun der europäescher Agence fir Fluchsécherheet. Konkret kréien d'Airlines recommandéiert, datt se derfir suergen, datt jiddereen am Fliger eng Mask undeet, wann en an de Fliger eraklëmmt a se réischt ausdeet, wann een op der Destinatioun ukomm ass. Fir Kanner ënner 6 Joer wieren Ausnamereegelen awer méiglech.

D'Maske sollten all 4 Stonne gewiesselt ginn. D'Passagéier sollten dowéinst genuch Maske mathuelen an och d'Fluchgesellschafte selwer sinn opgeruff, e Stock unzeleeën. An et sollt am Fliger, esou wäit dat méiglech ass, och e Mindestofstand agehale ginn. Fir eng Distanz vun annerhallwem Meter ze garantéieren, sollt, wann et der EU nogeet, ee Sëtz pro Rei respektiv all zweet Rei am Fliger fräi gelooss ginn. An och de Service u Bord sollt op e Minimum reduzéiert ginn.

D'EU wëll erreechen, datt d'Leit sech am Fliger sécher fillen, huet déi zoustänneg Transportkommissärin Adina Valean erkläert. Der Aviatioun kéint esou gehollef ginn, fir d'Suitte vun der Pandemie an de Grëff ze kréien.

Der Aviatioun kéint esou gehollef ginn, fir d'Suitte vun der Pandemie an de Grëff ze kréien. D'Fluchgesellschafte gesinn dat wéi gesot anescht.