Zu Minneapolis am Minnesota war den Afro-Amerikaner un de Suitte vun engem Policeasaz gestuerwen. Dëst huet zu landeswäite Protester gefouert.

An den USA ass d'Roserei wéinst dem Doud vum George Floyd a wéinst Rassismus a Policegewalt géint Schwaarzer am Allgemengen grouss. Trotz Ausgangsspär sinn e Freideg den Owend nees e puer Dausend Mënschen zu Minneapolis op d'Strooss gaangen.

Och zu New York hunn Dausende Leit géint Rassismus protestéiert. An der Nuecht op e Samschdeg koum et an de Staddeeler Manhattan a Brooklyn zu Ausernanersetzungen. Der Telechaine CNN no huet d'Police op d'mannst 72 Mënschen festgeholl. Op béide Säite sollen et Blesséierter ginn.

E Méindeg ass de 46 Joer alen George Floyd, e schwaarzen Amerikaner, gestuerwen, nodeems e wäisse Polizist bal néng Minutte laang op sengem Genéck geknéit huet. An engem zweete Video, dee rezent publizéiert gouf, gesäit een, datt net just een, ma direkt dräi vu véier Beamten um Mann souzen. Een dovunner hat de Knéi an den Hals vum George Floyd gedréckt. De Mann hat nach ëm Hëllef geruff, ier en du vu sech war a kuerz drop am Spidol un de Suitte vun dësem Policeasaz gestuerwen ass.

Dësen, wéi CNN schreift, elo Ex-Polizist war gutt um Video z'erkennen. De Mann gouf e Freideg verhaft, dat huet de Commissioner of the Minnesota Department of Public Safety John Harrington confirméiert. Kuerz drop huet de Parquet bekannt ginn, datt de Mann wéinst Doudschlag ugeklot ginn ass.