De Robert Behnken an den Douglas Hurley waren zanter 2011 déi éischt Astronauten, déi nees aus den USA an d'All geschoss goufen.

No 2 Méint op der internationaler ISS-Raumstatioun koumen déi amerikanesch Astronaute vun der „Crew Dragon“- Raumkapsel, déi vum Elon Musk senger Entreprise SpaceX entwéckelt gouf, elo nees zeréck op d'Äerd.

De Robert Behnken an den Douglas Hurley sinn e Sonndeg den Owend um 20.48 Auer Lëtzebuerger Zäit virun der Küst vu Florida am Golf vu Mexiko gelant.

Enn Mee, war d'"Crew Dragon"-Raumkapsel den éischte Start vun engem bemannte Raumschëff aus den USA, zanter dem Enn vum Space-Shuttle-Programm 2011.

Zanterhier waren déi Vereenegt Staaten op russesch Rakéiten ugewisen. Den Monopol schéngt elo nees gebrach ze sinn. Déi nei amerikanesch Raumschëffer wäre méi modern a komfortabel a kéinten duebel souvill Leit mathuelen.