De Lukaschenko regéiert zanter 26 Joer zu Minsk. E Sonndeg ass hie mat 80,2 Prozent vun de Stëmmen erëmgewielt ginn, dat mellen d'Staatsmedien.

Offiziellen Angaben no, louch d'Walbedeelegung bei iwwer 45 Prozent. Vun e leschten Dënschden u konnten d'Wäissrussen hir Stëmm ofginn.

D'Oppositioun an hir Kandidatin Swetlana Tichanowskaya zweiwelt dat Resultat ferm un. Virun allem, well si just op knapp 9,9% vun alle Stëmme komm ass. An de leschte Wochen hat si massiv u Popularitéit gewonnen. Si hat ëmmer nees viru Walbedruch gewarnt.

Bei Protester géint déi ëmstridde Presidentschaftswal a Wäissrussland sinn der Regierung no am ganze Land ronn 3.000 Demonstrante festgeholl ginn. Eleng an der Haaptstad Minsk goufen et dausende Festnamen, esou den Inneministère e Méindeg. Méi wéi 50 Zivilisten an 39 Polizisten si bei Zesummestéiss blesséiert ginn. D'Demonstrante solle Freedefeier geschoss, Barrikaden opgeriicht an d'Police mat Objete geschmass hunn.

Den Aktivisten no, soll och een Demonstrant bei den Zesummestéiss mat der Police gestuerwe sinn, allerdéngs kann d'Regierung dat net confirméieren.

E Sonndeg den Owend hunn d'Ausernanersetzungen tëscht den Demonstranten an der Police ugefaangen, dat trotz engem Demonstratiounsverbuet. D'Police ass mat Schockgranaten, Waasserwerfer a Gummi-Geschosser géint Leit déi protestéiert hunn, virgaangen.

Kuerz virdrun haten d'Medien a Wäissrussland éischt Prognose publizéiert. Hei goung ervir, dass de alt nees den Alexander Lukaschenko d'Wal soll gewonnen hunn, dat mat enger frappanter Majoritéit.

E Méindeg huet dann och d'Walkommissioun de Lukaschenko als Gewënner erkläert. D'Oppositiounskandidatin Swetlana Tichanowskaja huet de Lukaschenko iwwerdeems opgefuerdert sech zeréckzezéien an huet iwwerdeems sech selwer als Gewënnerin ernannt.

Déi 37-Joer-al Tichanowskaja huet, hirer Ekipp no, aus Sécherheetsmoossnam an der Nuecht op e Sonndeg net Doheem geschlof.

Si ass ugetrueden, nodeems hire Mann, de bekannte Blogger Sergej Tichanowski, an de Prisong koum a vun der Wal ausgeschloss gouf.

Hir Kanner hat si schonn an d'Ausland bruecht. Observateure waren zu deem Moment och scho vu Walfälschung ausgaangen, an hu mat enger Victoire fir de Lukaschenko gerechent. Onofhängeg international Wal-Observateuren op der Plaz waren net zougelooss.