D'wäissrussesch Oppositiounskandidatin Swetlana Tichanowskaja ass a Litauen geflücht, dat huet de litaueschen Ausseminister bestätegt.

Fir déi zweet Nuecht hannerteneen, koum et nees zu Demonstratiounen a Wäissrussland, no den ëmstriddenen Presidentiellen vun e Sonndeg. Virun allem an der Haaptstad Minsk gouf et schwéier Konfrontatiounen tëscht Regime-Kritiker an der Police, déi ganz vehement géint all Maniff virgeet. Een Demonstrant ass dobäi ëm d’Liewen komm.

Vun offizieller Säit heescht et, e Sprengsaz, deen de Mann wollt op d’Police geheien, wier ze fréi explodéiert.

D’Manifestante geheien dem President Lukaschenko jo vir, d’Walen op en neits manipuléiert ze hunn. Hien soll e Sonndeg gutt 80% vun alle Stëmmen kritt hunn, wat och aus dem Ausland nawell ugezweiwelt gëtt.

Um Dënschdeg de Moie war et dann och d'Meldung, dass d'Oppositiounskandidatin Swetlana Tichanowskaja a Litauen geflücht ass. Si wier gutt do ukomm a wier a Sécherheet, heescht et vum litaueschen Ausseminister Linas Linkevicius.

An engem Video-Message, deen zanter deem ëffentlecht gouf, seet d'Oppositiounspolitikerin, d'Decisioun, d'Land ze verloosse wier hir ganz schwéier gefall. Si wier net gezwonge ginn, si hätt selwer decidéiert bei hir Kanner ze goen. D'Tichanowskaja hat hir 2 jonk Kanner aus Sécherheetsgrënn virun de Walen aus dem Land bruecht.

"Ech weess, datt vill Leit mech verstoe wäerten, vill mech verurteele wäerten a vill mech haasse wäerten", seet si am Video. Ma si géif hoffen, datt keen an esou eng Situatioun géif komme wéi si. D'Walen hätte si méi matgeholl, wéi si geduecht hätt. "Ech hat geduecht, de Walkampf hätt mech ofgehäert a mer Kraaft ginn, alles duerch ze stoen", esou d'Tichanowskaja, "mee ech si wuel déi schwaach Fra bliwwen, déi ech am Ufank war."

Zu den Demonstranten sot si, se sollten op sech oppassen. Dat, wat grad geschéie géing, wier "keen eenzegt Liewe wäert." Si wéilt "kee Blutt a keng Gewalt", d'Leit sollte sech net géint d'Police wieren a sech un d'Gesetzer halen.

D'Swetlana Tichanowskaja hat sech onerwaart zur Hoffnung vun der Oppositioun entwéckelt, nodeems si sech opgestallt huet wéi hire Mann Sergej Tichanowski an de Prisong koum a vun der Wal ausgeschloss gouf. Hien ass e bekannte Blogger, deen oppen iwwer Korruptioun a Mëssstänn ënnert dem Lukaschenko geschriwwen huet.

Hir Ausrees koum iwwerraschend fir vill Observateuren. Um Méinden hat si nach op enger Pressekonferenz gesot, si wéilt am Land bleiwen a weider kämpfen, a si huet eng offiziell Reklamatioun géint d'Walresultat ageluecht. Duerno soll si stonnelaang net méi z'erreeche gewiescht sinn, schreift déi däitsch Noriichtenagence DPA.