Gutt zwee Méint virun de Presidentschaftswalen an den USA huet den Donald Trump op en Neits virun de Bréifwale gewarnt.

Am Gespréich mat Fox Business huet den US-President gesot: "Dat gëtt de gréisste Bedruch an der Geschicht!". Hie behaapt nämlech, dass an enger Partie Bundesstaaten, dorënner Virginia, Stëmmziedelen net nëmmen un d'Awunner selwer, mä och un hir Muppen an u verstuerwen Amerikaner verschéckt ginn.

Weider heescht et vum Trump, dass d'Bréifwal Mëttel an Zweck vun den Demokrate wier, fir géint hie mat enger méi héijer Walbedeelegung ze gewannen. Dëst ass net déi éischte Kéier, dass sech den US-President negativ iwwert d'Bréifwal äussert.

Fir seng Accusatioune konnt den Donald Trump awer nach keng Beweiser virleeën.

Wéinst der Corona-Pandemie setze sech d'Demokraten dofir an, dass d'Awunner dëst Joer kënne per Bréifwal hir Stëmm ofginn, fir d'Verbreedung vum Coronavirus esou gutt et geet anzedämmen. Experte weise sech besuergt, dass den Trump ëmmer nees viru Walbedruch warnt, a fäerten, dass esou d'Integralitéit vum Walsystem kéint a Fro gestallt ginn.

Keng Sue fir d'Post

Elo wëll den Trump d'Bréifwal mat Drock op d'Post aus der Welt schafen. Am ugeschwaten Interview sot den US-President nämlech, datt d'Post virun de Wale keng zousätzlech Gelder ze erwaarden hätt. Konkreet geet et hei ëm 25 Milliarden Dollar fir den US-Postal-Service a ronn 3,5 Milliarden, fir de Waloflaf an den eenzelen US-Bundesstaaten ze verbesseren. Wann et déi Finanzsprëtz net géif ginn, kéint och keng Bréifwal duerchgefouert ginn.

D'Demokrate geheien dem Donald Trump vir, geziilt dorop ze setzen, datt d'Post am November bei de Walen der Saach net Meeschter gëtt a mat all de Bréiwer ferm an d'Laberente kënnt. Si ginn nämlech dovun aus, datt sech bal d'Hallschecht vun de Bierger wéinst der Corona-Pandemie net fir de Wee bei d'Wal-Urn entscheede, ma vun der Bréifwal profitéiere wëllen.