D'Schwäizer hunn de Referendum géint d'Zouwanderung aus der EU refuséiert.

Wéi aus Héichrechnungen ervirgeet, hunn 62 Prozent vun de Wieler decidéiert, um Accord mat der EU festzehaalen. Déi nationalkonservativ Vollekspartei SVP wollt, dass d'Ofkommes gekënnegt gëtt, fir dass manner Auslänner an d'Schwäiz sollte kommen.

D'SVP hat argumentéiert, dass ze vill Mënschen an der Schwäiz de Wuelstand géingen erofdrécken an ze deier fir de Sozialsystem wieren.

An de leschten 30 Joer ass d'Populatioun am Alpe-Staat ëm ee Véierel geklommen, dat virun allem well Leit aus anere Länner zougezunn sinn. D'EU-Bierger maachen ronn 1,4 Milliounen vun de Residenten an der Schwäiz aus.

Den Accord, ëm deen et am Referendum goung, erlaabt et EU-Bierger an der Schwäiz ze liewen an do ze schaffen. D'Ofkommes ass awer och d'Viraussetzung dofir, dass d'Schwäiz zum Beispill Zougang zum EU-Marché kritt.

Déi aner Parteien haten dowéinst virun de wirtschaftleche Konsequenze gewarnt, falls den Accord gekënnegt sollt ginn.