Den Donald Trump huet am Waljoer 2016 an dat éischt Joer als President, also 2017, quasi keng Steiere bezuelt.

Dat behaapt op d’mannst en Artikel vun e Sonndeg den Owend aus der New York Times, dee sech op Steier-Ënnerlage berifft. Just ronn 750 Dollar wiere jeeweils bezuelt ginn.

Der Times leien eegenen Aussoen no d’Ënnerlagen aus de leschten 20 Joer vir, déi beleeë géifen, dass och scho laang, ier hie President war, keng Akommes-Steier vum Trump bezuelt gi wier, well hie quasi just Perte verbucht hätt.

Aus dem Wäissen Haus heescht et, dat alles wiere Fake News. Seng Steiererklärung publizéieren, wéi dat fir e President üblech ass, wëll den Trump awer weiderhin net.

Weider sot den Trump, hien hätt vill Steiere bezuelt an d'Steieramt IRS hätt hien ëmmer ganz schlecht behandelt, beklot den US-President.

Den Trump hätt Milliounen Dollar u perséinleche Steiere bezuelt, betount iwwerdeems een Affekot vun der Trump Organization, den Alan Garten.

Den Ënnerlagen no hätt den Trump mat der Tëleessendung "The Apprentice" 427,4 Milliounen Dollar verdéngt, mat sengen Hoteller géing hien iwwerdeems gréisstendeels just Verloschter maachen.

Detailer aus dem Bericht hunn dann och am Internet deels dofir gesuergt, datt de Geck mam US-President gemaach gouf. Deemno hätt den Trump nämlech 70.000 Dollar u Coiffeurskäschte vun de Steieren ofgesat. Fir seng Duechter Ivanka hätten iwwerdeems néng Trump-Firme Käschte vu 95.464 Dollar fir Coiffeur a Make-up vun de Steieren ofgesat.