Dat Ganzt ass e Freideg géint 17 Auer an der Géigend vun enger Schoul zu Conflans Saint-Honorine am Departement Yvelines passéiert.

D'Beamten, déi op d'Plaz geruff goufen, hunn den Täter am Nopeschduerf Eragny-sur-Oise erëmfonnt, eng véier Kilometer vun der Schoul ewech. Zeien, deenen de jonke Mann opgefall war, haten d'Polizisten, déi no him gesicht hunn, alarméiert. Den 18 Joer jonken Täter war nach ëmmer arméiert an aggressiv, esou dat d'Beamten eng 10 Mol op hie geschoss hunn. Verschidde franséische Medien no huet den 18 Joer jonke Mann dëst net iwwerlieft. Offiziell ass dat awer nach net confirméiert.
Am Ganze goufen 9 Persounen, dorënner och ee Mannerjäregen, virleefeg an de Garde à vue gesat. Et handelt sech an der Haaptsaach ëm Leit aus dem Familljekrees vum Ugräifer.

Wéi franséisch Medien mellen, soll de 47 Joer ale Geschichtsprofesser am Kader vun engem Cours iwwer Meenungsfräiheet eng Karikatur vum Mohammed gewisen hunn. Virdrun hat hien de Kanner gesot, datt si de Raum dierfte verloossen, well hie se net mat dëse Biller schockéiere wëll.

Dëst hat an der Klass, wéi och an der ganzer Gemeng, fir vill Opreegung gesuergt. An der Suitte gouf de Professer dunn e Freideg virun der Schoul vu sengem 18 Joer ale Schüler ëmbruecht a gekäppt. Nach éier d'Police hie fonnt huet, huet den Täter seng Dot an de soziale Medie publizéiert.

Infoe vu FrancInfo no war den Täter den Autoritéite bis ewell net opgefall. De jonke Mann soll 2002 zu Moskau gebuer gi sinn. De "Parquet national antiterrorist" huet sech dem Fall ugeholl.

De President Emmanuel Macron ass no der grujeleger Dot op d'Plaz gefuer, wou hie vun engem "islamisteschen terroristeschen Attentat" geschwat huet. Den Anti-Terror-Parquet ermëttelt a soll e Samschdeg am Nomëtten op enger Pressekonferenz weider Detailer bekannt maachen.