Wéinst dem Verdacht vu reliéisem Extremismus goufen e Méindeg eng Partie Razzien duerchgefouert.

Dat hat de franséischen Inneminister Gérald Darmanin dem Radiosender Europe 1 géintiwwer matgedeelt. Déi verdächteg Persoune stinn awer "net onbedéngt a Verbindung" mam Mord e Freideg. Zil wier vill méi "eng Botschaft ze vermëttelen" un d'"Feinde vun der Republik".

Aus Ermëttlungskreesser heescht et, dass Verdächteger wéinst radikale Priedegten an Haassnoriichten am Netz am Fokus vum Geheimdéngscht stinn. Donieft goufe géint 80 Persounen Ermëttlungen an d'Weeër geleet, déi behaapt hunn, "den Enseignant hätt et dorop ugeluecht".

Wat war geschitt?

E Freideg géint 17 Auer goufen d'Beamte vun der Police an d'Géigend vun enger Schoul zu Conflans Saint-Honorine am Departement Yvelines geruff. En 18 Joer ale Mann huet e Geschichtsproff ëmbruecht, nodeems deen am Kader vun engem Cours iwwer Meenungsfräiheet eng Karikatur vum Mohammed gewisen hat. Virdrun hat hien de Schüler gesot, datt si de Raum dierfte verloossen, well hie se net mat dëse Biller schockéiere wéilt.

4 Kilometer vun der Schoul ewech hat d'Police den Täter am Nopeschduerf Eragny-sur-Oise fonnt. Well hie sech de Beamte géintiwwer aggressiv verhalen huet an arméiert war, gouf 10 Mol op hie geschoss. Verschidde franséisch Medien mellen, dass hien dobäi ëm d'Liewe koum. Offiziell confirméiert gouf dëst awer nach net.

Bis ewell goufen 11 Persoune festgeholl. Et handelt sech an der Haaptsaach ëm Leit aus dem Familljekrees vum Ugräifer.

© AFP/Bertrand GUAY