D'Attack war an der Eglise Notre-Dame zu Nice. E Mann an eng Fra goufen am Gebai ëmbruecht, eng weider Persoun ass an engem Bar gestuerwen.

Grujeleg Messerattack zu Nice um Donneschdeg de Moien. De leschten Informatiounen no, sinn nëmmen e puer Deeg no der Attack op de franséische Geschichtsprofesser Samuel Paty, dräi Persounen ëm d'Liewe komm a méi Leit blesséiert ginn. Op d'mannst eent vun den Affer hätt den Hals duerchgeschnidde kritt.

D'Attack war an der Eglise Notre-Dame zu Nice. E Mann an eng Fra goufen am Gebai ëmbruecht. Eng drëtt Persoun déi schwéier blesséiert ginn ass, ass an engem Bar an der Géigend un hire Blessure gestuerwen.

Nice/Reportage Tim Morizet

De Christan Estrosi fuerdert, datt all d'Kierchen an an aner Lieux de cultes entweder iwwerwaacht ginn oder zougemaach ginn. Ze vill wier ze vill. Et wier Zäit, datt Frankräich sech Gesetzer géif ginn, fir definitiv dem "Islam-Faschismus" um Territoire en Enn ze setzen.

De President Emmanuel Macron gëtt op der Plaz erwaart. De Parquet antiterroriste huet eng Enquête opgemaach. Den Täter gouf an der Interventioun blesséiert an gouf an d'Spidol bruecht.

Wéi de Premier Jean Castex an der Assemblée nationale zu Paräis matgedeelt huet, ass d'Urgence "Attentat" ausgeruff

2016 war et schonn eng Kéier an der franséischer Stad zu enger islamistescher Attack komm. Den Täter deemools war um franséischen Nationalfeierdag op der Promenade des Anglais mat engem Camion duerch d'Mënschemass gefuer. 86 Persoune waren hei ëm d'Liewe komm.

Avignon: Persoun mat Waff vu Police erschoss

Um 11.15 Auer kuerz no der Attack zu Nice war et zu Avignon ee Mann, deen am Quartier Montfavet mat enger Waff d'Police menacéiert huet. Hie gouf vun der Police erschoss.