Wärend d'Politik iwwert Ännerungen am Infektiounsschutzgesetz ofstëmmt, hunn dausende Mënschen zu Berlin géint d'Restriktiounen demonstréiert.

E Mëttwoch de Moien haten d'Protester am Berliner Regierungsvéierel ugefaangen. Der Regierungskoalitioun gëtt vun de Géigner virgeworf, eng "Corona-Diktatur" ze bedreiwen. Fir d'Aarbecht am Parlament net ze beanträchtegen, gouf d'Regioun ëm de Bundestag op Uerder vum Inneministère ofgespaart.

Dausende Persounen hate sech an der Géigend vum Reichstag getraff, fir géint déi nei Moossnamen am Kader vum neien Infektiounsschutzgesetz ze demonstréieren. Nodeems déi meescht Demonstranten de Sécherheetsofstand net agehalen hunn a kee Mond- an Nueseschutz unhaten, obwuel d'Police si ëmmer nees dozou opgefuerdert hat, gouf d'Manifestatioun kuerz no 12 Auer opgeléist.

Donieft gouf ugekënnegt, dass Waasserwerfer géingen an den Asaz kommen, sollt sech der Opfuerderung widdersat ginn. Iwwer 2.200 Beamte waren Asaz. Ënnerstëtzung krut d'Berliner Police vu Polizisten aus 9 weidere Bundeslänner an der Bundespolizei. Aenzeien op der Plaz hu vun enger "extrem aggressiver Stëmmung" bei den Demonstrante geschwat.

An de sozialen Netzwierker huet d'Police matgedeelt, dass Demonstrante mat Fläschen, Steng a Knupperten op si geschoss a mat Pefferspray ugegraff hätten.