De Schock setzt och e Mëttwoch nach déif an der Stad un der Grenz zu Lëtzebuerg.

Dausende vu Leit waren um Mëttwoch hei versammelt, fir un d’Affer ze denken, sech géigesäiteg Kraaft ze ginn an iergendwéi dat ze verschaffen, wat der vill en Dënschdeg och vu ganz no hu misse materliewen. Well och déi sëllegen Zeien an Awunner vun der Stad mussen d’Evenementer elo verschaffen. An dofir waren e Mëttwoch de ganzen Dag och Mataarbechter vun der "Seelsorge Trier" an der Stad ënnerwee fir fir d’Leit do ze sinn a mat hinnen ze schwätzen, wéi eis eng Mataarbechterin op der Platz erkläert huet.

Et ass also e Schock fir vill Tréierer an och Lëtzebuerger déi zu Tréier wunnen, schaffen oder do studéieren. Mir hunn mam Diana Granja, wat an der däitscher Stad studéiert, iwwert d’Situatioun geschwat.

Hëllef no der Amokfaart zu Tréier
D'Situatioun war e Schock fir Zeien an Awunner.

Tréier an Trauer

Zwee Deeg no der Amokfaart denkt Tréier um Donneschdeg mat enger Trauerminutt un d'Affer vun der Attack. 5 Mënsche si gestuerwen an 18 Persoune goufe blesséiert, wéi e Mann mat engem Jeep duerch d'Foussgängerzon zu Tréier gefuer ass.

Um genee 13.46 Auer en Donneschdeg de Mëtteg ass d'Gedenkminutt. An der Foussgängerzon si 5 Mënsche gestuerwen: 3 Fraen vu 25, 52 an 73 Joer, e Mann vu 45 a säi klengt Meedche vun 9 Wochen.

E Mëttwoch gouf a Gedenken u si d'Porta Nigra Violett bestraalt.

De schëllege Chauffer vun 51 Joer aus dem Raum Tréier war den Ament vun der Dot alkoholiséiert. E politescht oder reliéist Motiv gëtt bis ewell ausgeschloss.