D'Baleare versiche mat neien drastesche Moossnamen, d'Verbreedung vum Coronavirus anzedämmen.

Well d'Balearen bal déi héchsten Infektiounszuelen a ganz Spuenien hunn, wëll d'Regierung elo nach méi haart duerchgräifen. Nei Restriktioune gi verhaangen, déi e Krack méi streng si wéi déi aus der Vergaangenheet.

Nodeems et verbuede gouf, Leit bei sech heem z'invitéieren, solle Passagéier elo am ëffentlechen Transport net méi matenee schwätzen. Op dës Manéier soll verhënnert ginn, dass Aerosole fräigesat ginn an ee sech an de Busser infizéiert. Wéi an Zukunft soll kontrolléiert ginn, ob dës Mesure dann och agehale gëtt, ass net gewosst. Op Mallorca mussen iwwerdeems och d'Restauranten, Baren, Akafszentren a Fitnessstudioen hir Dieren zoumaachen.

Offiziell huet d'Zentralregierung och demonstréiere verbueden, ma d'Awunner fille sech kujenéiert an ëm hir demokratesch Rechter bruecht.

D'Nerve leie blouss an d'Gedold riskéiert weider ze räissen. Zanter dem 15. Dezember ass een um Warnungsträpplek 4 op Mallorca an dee steet fir "extreme Risk". De Couvre-feu fänkt offiziell um 22 Auer owes un, mä elo sollen d'Awunner fräiwëlleg awer schonn um 20 Auer doheem sinn. D'Limitte vun der Acceptanz si verspillt, mä bis an de Februar eran bleift et batter – och op enger Vakanzeninsel.

En Dënschdeg louch den Inzidenzwäert vun de leschte 7 Deeg pro 100.000 Awunner bei ronn 310.