Hien huet eng deementspriechend Demande vun den Demokrate refuséiert.

Et soll en Zeeche gesat ginn. Bis ewell gouf et dat nach ni, dass zwee Mol probéiert gouf, en US-President sengem Amt ze enthiewen. Elo awer schonn. D’Impeachment-Prozedur géint den Donald Trump, déi leeft.

Impeachment-Prozedur: Detailer vum Joël Detaille

Et kann een duerchaus vun engem historeschen Ament schwätzen. An der Uklo am Representantenhaus gëtt dem Donald Trump en"Opstand géint d’USA virgehäit". Dat wéinst dem Stuerm op d’Kapitol d’lescht Woch, vu sengen Sympathisanten, wat hie selwer mat soll ugestëft hunn, an och laang net verurteelt huet. An den Aen vun den Demokraten, wier dat net acceptabel, an engem Presidente-Stull einfach net wierdeg.

En Dënschdeg den Owend huet sech den Donald Trump dann awer eng éischte Kéier ëffentlech zu Wuert gemellt.

Bei enger Visitt am Texas huet hie sech effektiv verdeedegt géint d’Reprochen, déi him gemaach ginn, an hien huet dobäi vun enger Hexejuegd geschwat, déi géint hie géif lafen.

Den Donald Trump schwätzt vun Hexejuegd

De Choix vu senge Wierder, fir dat ze beschreiwen an ze bewäerte wat am Kapitol virgefall ass, wier ganz appropriéiert gewiescht, sou den Trump weider. Hien hätt nimools an zu kengem Ament zu Gewalt ugestëft.

Trotzdeem, dee 6. Januar wäert an d’Geschicht agoen, an d’Opschaffen dovunner wäert sech och laang an d’Amtszäit vum Joe Biden eranzéien.

Symbolesch jo eleng schonn, dass de Biden den 20. Januar, also an enger Woch, virum Kapitol wäert vereedegt ginn.

Wéi leeft déi ganz Impeachment-Prozedur dann elo genee of? Eng vun de Méiglechkeeten ass jo schonn emol vum Dësch.

Richteg, an zwar déi, dass de Vizepresident als Chef vum Senat de 25. Zousazartikel vun der US-Verfassung kéint aktivéieren, fir de President ofzesetzen.

Dat refuséiert de Mike Pence awer ze maachen. Hien huet dat dem Representantenhaus och schonn esou schrëftlech matgedeelt. Deemno bleift elo, den, nenne mer et emol, „normale“ legislative Wee, iwwert zwee Votten am Kongress.

Also am Representantenhaus, an am Senat, an am Representantenhaus sinn d’Demokrate mat hirer Majoritéit vun 222 Mandater jo net op d’Ënnerstëtzung vun de Republikaner ugewisen, well do eng einfach Majoritéit duergeet.

Dat ass am Senat awer anescht. Hei brauch een eng 2-Drëttel-Majoritéit ënnert den 100 Sëtz – also op d’mannst 67 Senateuren, déi hire „feu vert“ ginn, an dat schéngt da méi onwarscheinlech. Hei hunn d’Republikaner nämlech 50 Sëtz, also d’Hallschent. Hei misste sech also 17 Partei-Membere géint den aktuelle President ausschwätzen.

Ma souguer wann de Senat déi néideg Majoritéit géif beienee kréien, geet et zäitlech wuel net op, well de republikaneschen Fraktiounschef, de Senateur Mitch McConnell huet annoncéiert, dass fréistens den 19. Januar mat entspriechende Berodungen kéint ugefaange ginn, also grad emol een Dag ier den Trump souwisou d’Wäisst Haus muss raumen.

Lo ginn et zwar divers Spekulatiounen, wéi déi ganz Prozedur eventuell kéint beschleunegt ginn, mä richteg realistesch Chancen, huet dat éischter net.

Mä souwisou geet et den Demokraten emol net an éischter Linn drëm, den Trump wierklech ofzesetzen. De ganze probéierten Impeachment, also elo deen zweete jo schonn, no der ominéiser Ukrain-Affär am Dezember 2019, huet éischter e wichtege Symbol-Charakter.

Zukünfteg Presidenten warnen engersäits... an de Reputatiounsverloscht vun der US-Demokratie nees ze retabléieren.

An eng drëtt Saach spillt sécher och mat, nämlech déi, dass ee wëll verhënneren, dass den Trump 2024 nees an de Presidentielle kann kandidéieren. Hien huet jo schonn e puer Mol betount, dass hie sech net aus der Politik wäert zeréckzéien.

A vergiesse mer net: 74 Milliounen Amerikaner hunn den Trump bei de leschte Wale gewielt. D’Ënnerstëtzung fir den Nach-President, déi ass weiderhi ganz grouss.

Dat do riskéiert also eng länger Affär ze ginn. Wéi een den Donald Trump kennt, léisst dee Kritik jo net einfach esou op sech sëtzen.