Als éischte Bundesminister huet den Heiko Maas sech fir méi labber Corona-Restriktioune fir Leit ausgeschwat, déi sech impfe gelooss hunn.

Geimpfte Leit sollten nees hir Grondrechter ausüben dierfen, esou de Maas an engem Interview an der Bild am Sonntag.
Als Beispill huet hien den Accès a Restauranten a Kinoe genannt. Et wier zwar nach net ofschléissend gekläert, ob geimpfte Leit anerer nach infizéiere kënnen, ma wat kloer wier: e Geimpften hëlt kengem méi e Beootmungsapparat ewech, esou den SPD-Politiker. Domat géif op d'mannst een zentrale Grond fir d'Aschränkung vun de Grondrechter ewechfalen.

Hien erënnert dann och un d'Bedreiwer vun den aktuell zouene Restauranten, Kinoen, Theateren oder Muséeën, déi e Recht drop hätten nees opzemaachen, wann et eng Méiglechkeet dofir gëtt. An déi géif et ginn, wann ëmmer méi Mënsche geimpft wieren. Wa bis just geimpfte Leit an de Restauranten a Kinoe wieren, kéinten déi sech jo net méi géigesäiteg ustiechen. Hien huet déi bis elo gefouert Debatt "irreführend" genannt, well et net ëm Privilegie fir Geimpfter geet, mä ëm d'Ausübung vu Grondrechter. Déi hätt de Staat mat de Corona-Reegele massiv ageschränkt.

Hefteg Kritik um Heiko Maas sengem Virschlag kënnt ënnert anerem vun der "Deutsche Stiftung Patientenschutz". Den Eugen Brysch sot an engem Interview de Maas géif domat "d'Gespenster-Diskussioun" iwwer Impf-Privilegien ufeieren. Et géif net genuch Impfstoff ginn. Bei der Organisatioun vun der Impfstoffer géif et haperen an et wéisst een haut net, ob e Geimpften de Coronavirus kéint weiderginn.

D'FDP reagéiert och an nennt d'Propos einfach just "populistesch" an net duerchduecht. An enger Zäit wou den Impfstoff nëmme begrenzt disponibel a just fir Alters- a Fleegeheemer géif duerchgoen, wiere speziell Rechter fir geimpfte Leit definitiv dat falscht Signal. Iwwer esou eppes dierft een eréischt diskutéieren, wa vill méi eng grouss Offer un Impfstoff do wier, esou den Andrew Ullmann.

Den däitsche Gesondheetsministère huet d'Propos vum Ausseminister Heiko Maas dann och zeréckgewisen. Et kéint keng Ausname ginn, soulaang net kloer wier, ob eng geimpfte Persoun de Virus kéint iwwerdroen. Dat sot e Spriecher vum Ministère op Nofro hin vun der Noriichtenagence dpa zu Berlin.