Den Joe Biden ass um kuerz virun 12 Auer Lokalzäit, also kuerz virun 18 Auer eiser Zäit, zu Washington als 46. President vun den USA vereedegt ginn.

Um kuerz virun 16.30 Auer e Mëttwoch eiser Zäit waren den Joe Biden an d'Kamala Harris beim US-Kapitol wéi geplangt ukomm a sinn mat hire Partner/Partnerinnen duerch den Ostdeel an d'Gebai eragaangen.
Um 17.49 gouf den neien US-President Joe Biden als 46. US-President vereedegt, kuerz virdrun hat d'Vizepresidentin Kamala Harris hiren Eed feierlech ofginn, e ganz historesche Moment, well jo d'Kamala Harris jo déi éischte Fra op deem Posten ass.

© Rob Carr / GETTY IMAGES NORTH AMERICA / Getty Images via AFP

Ënnert anerem d'Lady Gaga an d'Jennifer Lopez waren op der Vereedegung e Mëttwoch opgetrueden. D'Lady Gaga selwer huet d'Nationalhymne gesongen, d'Kënschtlerin huet den Joe Biden jo aktiv am Walkampf ënnerstëtzt.

© Alex Brandon / POOL / AFP

Spéider dann ass och den US-President Joe Biden mat senger Famill am Wäissen Haus zu Washington ukomm.

Den Joe Biden gëtt vereedegt
Den Joe Biden ass um kuerz virun 12 Auer Lokalzäit, also kuerz virun 18 Auer eiser Zäit, zu Washington als 46. President vun den USA vereedegt ginn.

© Brendan SMIALOWSKI / AFP

Déi 1. Ried als neie President vun den USA

No senger Vereedegung huet den neie President Joseph Robinette Biden, Jr. -sou säi ganze Numm- vun enger grousser Victoire fir d'Demokratie geschwat. Et géif awer vill ginn, dat ee misst reparéieren an nei opbauen. Et wier eng schwéier an haart Zäit, virun allem en Vue vu Covid-19, ma och en Vue vun anere Problem, wéi Rassismus oder Ënnerdréckung.

Et géif elo nees drëms goen, fir d'Land ze vereenegen an Haass, Gewalt an Extremismus keng Chance ze ginn.

"Kommt mir lauschteren erëm een op deen aneren". Den Joe Biden huet a senger éischter Usprooch als US-President ëm 18 Auer e Mëttwoch den Owend eiser Zäit ëmmer erëm un d’Unitéit vun de Vereenegte Staaten appelléiert.

Puer Wieder iwwert d’Corona-Pandemie, puer Wieder iwwert de Klimawiessel,… mä haaptsächlech ass den Joe Biden op de politeschen Extremismus agaangen. „White Supremacism“, also déi, déi mengen, déi wäiss Populatioun wiere besser, géingen dem President no verléieren.

"Wann Dir nach ëmmer net d’accord sidd, dann ass dat esou. Dat ass Amerika. Dat ass Demokratie", sou den Joe Biden. Mä dat dierf net dozou féieren, datt d’Land sech weider spléckt. Hie géing de President vun all den Amerikaner sinn, sou de Biden.

Den Joe Biden huet drun erënnert, datt virun Deeg nach rosen Demonstranten de Kapitol gestiermt haten, Manifestatiounen, déi komplett degeneréiert waren. Dës Evenementer dierften net vergiess ginn, mä dës Leit géifen net d'Iwwerhand behalen:

Den Joe Biden iwwert d'Maniffen beim US-Kapitol

Och u seng Géigner huet sech den Joe Biden adresséiert an och si derzou opgeruff, trotz hirem Desaccord, op e friddlecht Zesummeliewen aus ze sinn.

Fir duerch den däischtere Wanter ze kommen, misst ee Politik op d’Säit leeën an d’Pandemie als eng Natioun ugoen. „Mir kommen zesummen doduerch. Zesummen“, sou den Joe Biden. Un d’Ausland war et de Message : d’USA si getest ginn. Mir wäerten eis Allianze reparéieren. Net fir d’Defie vu gëschter unzegoen, mä déi vu muer.

An enger Minutt vun Stëllt a Gebiet huet den Joe Biden och den 400.000 Covid-Affer an den USA erënnert. Alles misst lo dru gesat ginn, fir ze heelen an ze reparéieren, wat déi lescht Joren an den USA futti gemaach gi wier:

Den Joe Biden iwwert d'Zesummenhalen an den USA

Déi aktuell Kris weltwäit, d'Corona-Pandemie, de Rassismus bannent dem Vollek misst een dem neie Chef am Wäissen Haus no, affrontéierten an dogéint ugoen. Duerfir missten d'Amerikaner awer nees als unifiéiert Vollek beienee stoen. E leschte Message huet den demokratesche President un d'US-Truppen adresséiert:

Den Joe Biden adresséiert sech un d'Arméi

D'Ried vum Biden war vrun allem op d'US-Amerikaner zougeschnidden - ee Vollek dat batter Grief z'iwwerwannen huet - duerfir wëll de Biden alles ginn, fir dëst a senge Presidentejoren z'areechen.

Zënter Deeg war d'Opreegung an der amerikanescher Haaptstad grouss a wann eppes sécher war, dann, datt et eng aner Zeremonie géif ginn, wéi soss Joren.

Fir d'alleréischt huet d'Vollek gefeelt. Do wou normalerweis honnertdausende Mënsche géife stoen, fir ze klappen an ze feieren, ass et wéinst Covid-19 däitlech méi eidel gewiescht. Wéinst der Attack op de Kapitol gesäit et schonn zënter Deeg zu Washington aus wéi an engem Krichsgebitt. Eng 25.000 Membere vun der Nationalgard hu fir d'Sécherheet gesuergt. Dat sinn der 2,5 Mol méi, wéi viru 4 Joer.

Mënschemasse hunn den Joe Biden an déi nei Vizepresidentin Kamala Harris also net gesinn, dofir hu se dës Kéier op der National Mall 200.000 US-Fändelen, déi extra en place gesat goufen, gesinn.

© RTL Grafik

Op Twitter goufen et direkt no der Inauguratioun natierlech Gratulatiounen aus der ganzer Welt

Och de russesche President Putin huet dem neie President Joe Biden gratuléiert a matgedeelt, dass hien oppe wier fir eng Zesummenaarbecht mat den USA.

De Programm vum Dag

De Programm ëm 10 Auer Lokalzäit ugefaangen, mat engem Livestream, dee sech virun allem u jonk Leit adresséiert, ënnert anerem mat engem Message vun der nächster First Lady Jill Biden.

Um Punkt 12 Auer huet d'Mandat vum Joe Biden an der Kamala Harris ugefaangen. Dat ass esou an der amerikanescher Verfassung festgehalen. Och wann den Eed eréischt puer Minutte méi spéit géif ofgeluecht ginn.

No sengem Eed huet den Joe Biden seng éischt Ried als amerikanesche President gehalen. Den George Washington huet iwwregens 1793, wéi hie säin zweet Mandat ugefaangen huet, déi kierzte Ried als President gehalen. Si hat deemools grad emol 135 Wieder. Déi vum Joe Biden dierft eng Grimmel méi laang ginn a si steet ënnert dem Motto "America United".

Dono huet de President Unitéite vun der Arméi inspizéiert an da geet et op de Kierfecht vun Arlington. Do leet den Joe Biden eng Gerbe néier um Graf vum onbekannten Zaldot, a Presenz vu senge Virgänger Barack Obama, George W. Bush a Bill Clinton a gëtt dann an d'Wäisst Haus eskortéiert.

Ongewinnt war dës Kéier net just, datt bei der Assermentatioun de Publikum feelt, mä och de Président sortant. Den Donald Trump huet jo selwer decidéiert, d'Zeremonie ze schwänzen.

Juristesch gesinn ass dat iwwerhaapt kee Problem an den Joe Biden hat och nom Stuerm op de Kapitol gesot, et wier gutt, datt den Donald Trump net dobäi wier.

Den Trump ass dee 5. President an der Geschicht vun den USA, deen net dobäi ass, wa säi Successeur vereedegt gëtt.  Déi leschte Kéier war dat 1974 de Fall, wéi den Gerald Ford vereedegt gouf.

De Richard Nixon, deen iwwert de Watergate Skandal gefall war an huet missten zerécktrieden, hat och op d'Feierlechkeete verzicht. An de leschte Stonnen huet et vu Washington geheescht, den Donald Trump wier am Gaang, seng eegen Zeremonie, mat militäreschen Éiere virzebereeden. Déi soll e Mëttwoch de Moie Lokalzäit sinn, ier hien dann eng leschte Kéier u Bord vun der Air Force One a Florida bruecht gëtt.