Vun e Méindeg u kënnen zu Tréier Betriber an der Gastronomie nees hir Terrassen opmaachen. Et gëllen allerdéngs eng ganz Partie Restriktiounen.

Zu Tréier dierfen d'Restaurante vun e Méindeg un theoreetesch hir Terrassen opmaachen. Déi meescht haten awer nach zou, wéi mir an der Mëttesstonn op der Plaz festgestallt hunn.

Dat léich virun allem dorun, datt d'Decisioun de Weekend ganz kuerzfristeg annoncéiert gouf. D'Leit mussen nämlech am Viraus reservéieren a mussen och en negatiivt Testresultat dobäi hunn. Iwwerdeems war et e Méindeg an der Mëttesstonn och nach relativ frësch zu Tréier.

Tréier Ouverture Terrasse Gastronomie / Live vum Ryck Thill

Wéini dierf d'Gastronomie ophunn?

D'Haaptviraussetzung, fir datt d'Terrassen nees däerfen opzemaachen, ass eng Inzidenz vun ënner 100.

Donieft mussen d'Betriber en Hygièneskonzept hunn, Reservéierunge mussen am Viraus gemaach ginn, et gëllt eng Maskeflicht (OP-Masken oder FFP2-Masken) fir d'Personal an och fir d'Clienten, wann dës net un hirem Dësch sëtzen. D'Kontakter musse registréiert ginn.

Eng Neierung ass, dass et eng Testflicht gëtt. D'Leit kënnen entweder op der Plaz e Schnelltest maachen oder am Virfeld een Test maachen, ma deen däerf net méi al wéi 24 Stonne sinn. Schnelltester ginn och zum Beispill zu Tréier offréiert.
D’Ministerpresidentin aus Rheinland-Pfalz sot e Freideg den Owend, et wéilt een eng Méiglechkeet schafen, datt d’Leit an der Ouschtervakanz zum Beispill kéinte wandere goen an op enger Terrass eppes iessen oder drénken, amplaz op Mallorca ze fléien.

Op verschiddene Plaze kann een och gratis Schnelltester maachen.

Theoreetesch dierfen all d’Bundesländer vun dësem Méindeg un nees Terrassen opmaachen. Wéi et ënnert anerem am Saarland organiséiert gëtt, ass nach onkloer.