Bei relativ killen Temperaturen huet dat däitscht Bundesland un der Lëtzebuerger Grenz de Saarland-Modell lancéiert.

Bei eise franséischen a belschen Nopere bleiwen d'Terrassen nach zou. Am däitsche Rheinland-Pfalz ass et schonn zanter e puer Deeg méiglech, dobaussen z'iessen an ze drénken, ënner strengen Oploen. An am däitsche Saarland dierfen d'Restauranten an d'Caféen zanter en Dënschdeg nees Leit dobaussen empfänken.

Saarland mécht Terrassen op / Reportage Pierre Jans

Obwuel déi drëtt Coronawell d'Saarland net verschount, erlaabt d'Landesregierung mam sougenannten ''Saarland-Modell'' eng ganz Partie Ouverturen. D'Caféen a Restauranten dierfen nees Clienten empfänken, an zwar dobaussen. Eng Partie Leit hate sech vun de killen Temperaturen en Dënschdeg net aschüchtere gelooss an hate sech e Patt dobausse gegënnt, wéi een op de Biller an den däitsche Medie konnt gesinn.

D'Clientë mussen am Viraus reservéieren a si ginn an e Regëster agedroen, fir d'Kontakter am Fall vun enger Infektioun ze retracéieren. Am Kader vun den aktuelle Restriktiounen dierfen héchstens fënnef Persounen ouni Test zesummesëtzen. Wann all Client en negativen Test virleeë kann, dee manner al ass ewéi 24 Stonnen, dann dierfen héchstens 10 Leit op engem Dësch zesumme Plaz huelen. Grad ewéi dobaussen am Fräien also. Do gëllt dës Reegel och.

Nieft den Etablissementer dierfen och Theateren, Kinoen a Fitnesszenteren nees opmaachen. Hei musse Visiteuren en aktuellen negative Schnelltest matbréngen. Déi perséinlech Donnéeë ginn notéiert.

Jee no Inzidenzwäert an ofhängeg vun der Situatioun an de Spideeler kënnen d'Reegelen awer nees verschäerft ginn. E Lockdown ass net ausgeschloss.

D'Zuele klammen och an Däitschland nees. Dofir huet och d'Bundeskanzlerin Angela Merkel d'Decisioun vun hirem Parteikolleeg, dem saarlännesche Ministerpresident Tobias Hans, rezent kritiséiert. Dee verdeedegt säi Saarland-Modell awer: et misst een no engem Joer Pandemie och aner Iddien hunn, ewéi nëmmen zouzemaachen.

E Sonndeg louch d'Siwen-Deeg-Inzidenz am Saarland nach bei ronn 88 Neiinfektioune pro 100.000 Awunner. Aktuell läit se am Saarland bei iwwer 91.

Ënnert strengen Oploen, Limitatioune pro Dësch an Test-Flicht, ass a Rheinland-Pfalz op d'mannst och d'Gastronomie dobaussen erlaabt.

Dat gëllt awer nëmme fir Landkreesser oder Stied wou den Inzidenzwäert ënnert 100 läit. Zu Tréier zum Beispill läit en aktuell ënner 50.

Am Verglach: op en Dënschdeg gekuckt louch d'Inzidenz hei am Grand-Duché bei 196. An der leschter Woch vum Mäerz louch se bei knapps 269 positiv Fäll op 100.000 Awunner. Deemools hat d'Lëtzebuerger Regierung annoncéiert, den Horesca-Secteur kéint d'Terrasse vum 7. Abrëll un nees opmaachen.