De Regierungschef Ralph Gonsalves warnt, et kéint esouguer nach méi staark Ausbréch ginn.

Op der karibescher Insel St. Vincent an de Grenadinnen ass de Vulkan mam Numm La Soufrière ausgebrach. Déi éischte Kéier zanter véier Joerzéngten.

Dausende Mënsche wären aus dem geféierlechem Perimeter a Sécherheet bruecht ginn, heescht et vun der Regierung vum Inselstaat. D'Evakuéierung war schwéier, well et deels staark Äsche gereent hat. Bei der hefteger Eruptioun e Freiden de Moie scho waren d'Äschewolleke bis 6.000 Meter héich an den Himmel geklommen. Dat huet de lokale Katastropheschutz matgedeelt. D'AFP mellt, dass sech de Weekend d'Wollek bis op d'Insel Barbados augebreed huet.

RTL

© ZEN PUNNETT / AFP

D'Awunner aus den Uertschafte ronderëm de Vulkan goufen deels op Croisièresschëffer a Sécherheet bruecht.

De Regierungschef Ralph Gonsalves warnt, et kéint esouguer nach méi staark Ausbréch ginn.

E Freideg de Mëtteg géint 14.41 Auer eiser Zäit, ass de Vulkan am Norde vu St. Vincent ausgebrach, dat wéi gesot eng éischte Kéier nees no iwwer 40 Joer. Op Biller ass ze gesinn, dass sech eng Schicht aus Äschen zu St. Vincent néier gelooss huet.

D'Autoritéiten hate allerdéngs mam Ausbroch vum Vulkan gerechent. De Regierungschef Ralph Gonsalves hat dofir en Donneschdeg schonn déi héchsten Alarmbereetschaft deklaréiert. Eleng an der Geforenzon wunne soss 16.000 Mënschen. Déi meescht goufe bis e Freideg a Sécherheet bruecht.

D'Autoritéite ginn dovunner aus, datt et zu weideren Eruptioune kéint kommen. Déi schwiereg Situatioun vun der Insel dierft nach Méint daueren, esou de Regierungschef, deen den Tréinen no war.