D'Nato huet no der Decisioun vun den USA, sech zeréckzezéien, d'Enn vun hirem Asaz an Afghanistan ageleet.

Déi 30 Memberlänner hunn dat an enger Videokonferenz decidéiert, nodeems d'USA, déi de gréissten Deel vun den Zaldoten op der Plaz hunn, jo annoncéiert hunn, sech no 20 Joer zeréckzezéien an hir Leit fir den 11. September heem ze huelen - um 20. Joresdag vun den Terrorattacken zu New York a Washington.

Ouni d'USA weider op der Plaz ze bleiwen, géif fir d'Alliéiert däitlech méi Käschten a méi e grousse Risiko bedeiten.

Den Ausseminister Jean Asselborn huet de Grand-Duché vertrueden an no der Videokonferenz ënnerstrach, datt d'Nato elo méi Ressourcen huet fir de Friddensprozess. D'Haaptzil misst en Enn vum Konflikt bleiwen, duerch Negociatiounen tëschent den Afghanen, e Prozess ëm dee si sech selwer misste këmmeren, ouni datt d'Acquisen a Saache Mënscherechter, Rechtsstaat a Kampf géint den Terrorismus verluer ginn.