De virtuelle Klimasommet ass ënnert anerem als Preparatioun geduecht fir déi nächst UNO-Klimakonferenz zu Glasgow am November.

D’USA huet sech am Kampf géing d’Äerderwiermung erëm op der globaler Bün zréckgemellt. Ob elo mat der Vereenegte Staaten als Zuchpäerd kann d’Rudder ëmgerappt ginn an de Klimawandel gestoppt ginn, wäert sech an den nächste Joerzéngte weisen. Wéi ëmmer op de Klimasommeten schéngt d’Motivatioun grouss.

Ënnert dem Donald Trump huet de Klimaschutz an den USA keng grouss Roll méi gespillt. D‘Land war aus dem Paräisser Klimaofkommes erausgeklommen. Lo soll sech awer erëm engagéiert ginn, wéi de Präesident Joe Biden um Klimasommet annoncéiert huet.

An nëmmen 9 Joer, also bis 2030, sollen d’CO2-Emissiounen an den USA am Verglach zu 2005 ëm d'Hallschent reduzéiert ginn. Besonnesch d’Pëtrol- a Gasindustrie wëll den Joe Biden mat strengen Oplage beleeën. Energiekonzerner solle verflicht ginn, méi Stroum aus erneierbaren Energien ze gewannen. Ob e sech domat duerchsetze kann, bleift nach ofzewaarden. No China sinn d’USA déi gréisste Verursaacher vu CO2-Emissiounen, dono kënnt och schonn d’Europäesch Unioun.

E Mëttwoch scho war vun den Europäesche Staats- a Regierungscheffen e neit Klimagesetz guttgeheescht ginn. Déi dätsch Bundeskanzlerin Angela Merkel widderhëlt nach eng Kéier um Sommet, datt festgehale gouf, datt d'Europäesch Unioun wäert bis 2050 klimaneutral sinn. Scho bis 2030 sollen d'CO2-Emissiounen ëm 55 Prozent am Verglach zu 1990 reduzéiert ginn.

De franséische Staatschef Emmanuel Macron huet a senger Ried och nach eng Kéier d’Drénglechkeet vun de Klimamesuren ënnerstrach.

D'Objektiv an den nächste Wochen a Méint ass ze acceleréieren, seet hien. Dëst fir d‘Ziler bis 2030 ze erreechen, déi präzis wieren, an ee se och moossen a verifiéiere kéint. 2030 wier dat neit 2050, sou de Staatschef.

Wëssenschaftler bleiwen awer skeptesch, op d‘Klimaziler wäit genuch ginn. D’Aspuerunge vun den CO2-Emissioune wieren och mam Erreeche vun den Ziler wuel nach ze niddreg, fir d’Äerderwiermung ëm 1,5 Grad géigeniwwer dem Wäert virum Virindustriezäitalter ze reduzéieren a sou de Klimawandel ze stoppen.