Bei Maniffen um Dag vun der Aarbecht koum et zu gewaltsamen Ausernanersetzungen tëscht Demonstranten an der Police. Honnerte Persoune gouf festgeholl.

Bei der traditioneller sougenannter revolutionärer Demonstratioun um 1. Mee ass et e Samschdeg den Owend zu Berlin zu Ausschreidunge komm. Deemno gouf et "massiv Attacke mat Steng a Fläschen" souwéi kierperlech Ugrëff op Policebeamten, wéi d'Police an der däitscher Haaptstad matgedeelt huet. Virdru waren eenzel Bléck vun Demonstranten duerch d'Police vun der Demonstratioun ausgeschloss ginn. Grond waren den Autoritéiten no Verstéiss géint d'Hygiènesvirschrëften.

Participanteë vun der Demonstratioun haten och Pyrotechnik gezünt a vereenzelt mat Knupperten op Poliziste geworf. Am Quartier Neukölln goufen Dreckseemeren a Sperrmüll a Brand gestach.

E Samschdeg den Owend géint 21.30 Auer huet d'Police vu Berlin dem Ganzen een Enn gesat an huet d'Demonstratioun ofgebrach. Et goufe Persoune festgeholl an Tréinegas agesat.

Am Ganze goufen 93 Beamte bei den Ausschreidunge blesséiert an 354 Persoune goufe festgeholl. D'Police war mat 5.600 Beamten am Asaz. E puer Dausend Mënsche ware bei den Demonstratiounen zu Berlin op der Strooss.

RTL

Hei Andréck vu Paräis. / © AFP

Och zu Paräis koum et e Samschdeg zu gewaltsamen Ausernanersetzungen tëscht Demonstranten an der Police. Den Autoritéiten no hu Persoune vum lénksextremen "Schwaarze Block" versicht, fir de Protestmarsch vun de Gewerkschaften duerch déi franséisch Haaptstad ze blockéieren. 34 Persoune goufe festgeholl, d'Police huet Tréinegas agesat.

D'Demonstranten hu Fënstere vu Banken ageschloen, Poubelle goufen a Brand gestach an d'Police gouf mat Saache beworf. Op d'mannst ee Polizist gouf blesséiert, sou een AFP-Journalist vun der Plaz.

Dem Inneministère no hunn a Frankräich iwwer 106.000 Persoune manifestéiert.