E Freideg koum et um Tempelbierg am Oste vu Jerusalem zu uergen Ausernanersetzungen tëscht Palestinenser an der israelescher Police.

D'Poliziste si mat Patrounen aus Gummi géint d'Palestinenser virun der Al-Aksa-Moschee virgaangen. Dosende Schëss waren ze héieren. Informatioune vun der Police no, déi d'Zougäng zum Tempelbierg iwwerwaacht, goufen d'Beamte vun "Randaléierer" mat "Steng, Fläschen an anere Géigestänn" beworf. E puer dausend Demonstrante stoungen de Policebeamte géintiwwer.

Stand Freideg goufen 49 Palestinenser a 6 Poliziste verwonnt, dat hunn d'Rettungsekippen an d'Police matgedeelt. E Samschdeg de Moien ass de Bilan op op d'mannst 180 Blesséierter geklommen. D'USA, d'Uno an d'EU hu sech besuergt gewisen an zur Deseskalatioun opgeruff. D'Gewalt wier inakzeptabel an d'Täter missten zur Rechenschaft gezu ginn, erkläert en EU-Spriecher e Samschdeg. Dowéinst den Opruff vun der EU, dréngend ze handelen.

Zanter dem Ufank vum Ramadan demonstréiere Palestinenser géint déi israelesch Siidlungspolitik am Oste vu Jerusalem. Bal all Dag kënnt et do zu Ausernanersetzungen tëscht de Palestinenser an der israelescher Police.