Een Dag, nodeems um Tempelbierg iwwer 200 Persoune verwonnt goufen, goufen et an der Nuecht op e Sonndeg iwwer 90 Blesséierter.

No den Tensiounen an de leschten Deeg zu Jerusalem huet den israelesche Justizministère annoncéiert, datt eng kruzial Auditioun um Geriicht, déi um Méindeg sollt sinn, no hanne verréckelt gëtt.

D'Geriicht zu Jerusalem soll decidéieren, ob 4 palestinensesch Famille kënnen aus hire Wunnenge geworf ginn, fir Plaz fir israelesch Siidler ze maachen. Eng nei Auditioun soll bannent 30 Deeg organiséiert ginn, heescht et am Schreiwes vum Ministère.

An de leschten Deeg sinn e puer Honnert Leit bei Protester géint d'israelesch Siidlungspolitik blesséiert ginn.

Hannergrond ass eng Decisioun vun engem Bezierksgeriicht zu Jerusalem ugangs vum Joer, dass d'Haiser vu 4 palestinensesche Famille rechtméisseg jiddesche Famille gehéieren.

Dem israelesche Gesetz no kënne jiddesch Persoune froen, dass si hir Proprietéitsrechter zréck kréien, wa si beweise kënnen, datt hir Famill virum Krich vun 1948 do gewunnt hunn. Ëmgedréit gëtt et déi Méiglechkeet awer net fir Palestinenser, déi hir Haiser am Krich verluer hunn.

D'Decisioun vum Geriicht huet also fir Roserei bei de Palestinenser gesuergt, déi zanter deem reegelméisseg op d'Strooss ginn.

RTL

© AFP/EMMANUEL DUNAND