Déi aktuell Geldpolitik vun den Zentralbanke kéint dem Aarbechtsmaart gehollef hunn, mä gläichzäiteg d’ekonomesch Ongläichheete verschäerft hunn.

De Gouverneur vun der kanadescher Zentralbank, den Tiff Macklem, sot dat jiddefalls an enger Ried op enger kanadescher Uni a Bezuch zu de Mesurë vun der Zentralbank wärend der Pandemie. Déi huet erëm am grousse Stil Scholden opkaaft, fir esou Suen an d’Ekonomie ze pompelen. Bekannt ënnert dem Numm "quantitative easing" géing déi Geldpolitik d’Demande stimuléieren, also och d’Schafe vun neien Aarbechtsplazen. Op der anerer Säit géing déi Politik awer och de Wäert vun Investment-Produkter wéi Aktien oder Obligatiounen an d’Luucht dreiwen, an esou de räiche Leit zegutt kommen, sou de Gouverneur vun der kanadescher Zentralbank.

Zanter der Finanz- a Wirtschaftskris 2008 an d’Joren duerno huet ënnert villen aneren och d’europäesch Zentralbank fir Dausende vu Milliarden Euro u Scholden zeréckkaaft. Obwuel sämtlech Etüden an Donnéeë weisen, datt d’Inegalitéiten tëscht de gréisste Verméigen an dem Rescht vun der Populatioun geklomme sinn, huet d’europäesch Zentralbank mat enger eegener Etüd 2019 behaapt, et wier de Géigendeel. D’Inegalitéite wieren éischter op d’Steiersystemer zeréckzeféieren.