An der Gemeng Beauraing, an der Wallonie, gouf et an der Nuecht op e Sonndeg en Tornado, dee fir ganz grousse Schued gesuergt huet.

Op de Biller gesäit een Haiser, déi keen Daach méi hunn; Fënsteren, déi futti sinn; Beem a Stroummasten, déi ëmleien an Debrisen, déi duerch Wise geblose goufen.

Vun den Autoritéiten heescht et, 92 Haiser wiere schro beschiedegt ginn, an engen 10 Stéck kéint een net méi wunnen.

17 Mënsche goufe liicht blesséiert. 13 ënnert hinne souzen op der Terrass vun engem Café, wéi den Tornado passéiert ass. En Zeien huet dat Ganzt als "apokalyptesch" bezeechent.

Schued och a Frankräich an Holland

De Weekend huet et an Deeler, haaptsächlech am Weste vu Frankräich, net just vill gereent mat Knëppelsteng, et war och vill Loft.

Besonnesch betraff déi kleng Gemeng Saint-Nicolas-de-Bourgeuil am Weste vum Land. Hei huet en Tornado d'Spëtzt vun engem Kierchtuerm mat ewech gerappt. Blesséiert gouf zum Gléck keen.

A groussen Deeler vu Frankräich hat de Wiederdéngscht wéinst Dimmer eng Alerte orange erausginn. Medieberichter no waren zäitweis Dausende Stéit ouni Stroum, Stroosse goufen iwwerschwemmt a Beem ëmgerappt.

An Holland haten d'Onwieder schonn e Freideg e gréissere Schued hannerlooss. Westlech vun Utrecht goufe 6 Haiser esou staark beschiedegt, dass se bis op Weideres net méi bewunnbar sinn. 9 Mënsche goufe blesséiert.

An der Regioun vum Nationalpark Utrechtse Heuvelrug sinn Dausende Beem ëmgeknéckt. Et geet een dovun aus, dass et en Tornado war. D'Ënnersichunge vum Wiederdéngscht sinn nach net ofgeschloss.