30 Kilometer vun Athen stinn an der Uertschaft Varympompi Haiser, Betriber an Vakanzewunnengen a Flamen.

Iwwer 500 Pompjeeën, 7 Fligeren, 5 Helikopteren an 70 Läsch Gefierer sinn hei am Asaz. Schonn en Dënschdeg goufen eng Partie Dierfer evakuéiert. D'Schied wieren enorm, sou een Awunner vu Varympompi. Duerch d'Hëtztwell ass d'Feier schwéier an de Grëff ze kréien. Et ass déi schlëmmsten Hëtztwell zënter méi wéi 30 Joer fir Griicheland. An d'Temperaturen sollen an den nächsten Deeg bei ronn 40 Grad bleiwen.

Op der griichescher Hallef-Insel Peloponnes, menacéieren d'Flamen elo och dat historescht Duerf Olympia, wou ëmmer d'Olympesch Feier ugefaange gëtt. Am ganzen goufen et schonn eng Dosen Doudeger.

Et sinn awer net nëmmen Regioune a Griicheland vu Bränn betraff. Och an Italien, Albanien a Kroatien huet ee mat Bëschbränn ze kämpfen. An Italien goufen och e puer Verdächteger festgeholl, déi verschidde Feier sollen geluecht hunn.

D'Tierkei kämpft dem President Erdogan no géint déi schlëmmste Bëschbränn an der Geschicht vum Land. D'Situatioun ass zanter Deeg kritesch. Et gëtt eng extrem Hëtztwell. Virun allem an de Vakanzeregiounen um Mëttelmier brennt et. E Mëttwoch huet och e Kuelekraaftwierk ugefaange mat Brennen. Op d'mannst 8 Mënsche si bis ewell gestuerwen.