1 Woch virun de Bundestagswale stounge sech e Sonndeg den Owend déi 3 Spëtzekandidate vun Unioun, SPD an de Gréngen an engem drëtten TV-Triell géintiwwer.

Leschten Triell an Däitschland / Reportage Anne Wolff

Dës Kéier haten d’Privatsender Pro7 a Sat1 dat Ganzt organiséiert.

Eng Woch virun de Bundestagswale war e Sonndeg den Owend de leschten TV-Triell tëscht de Kanzlerkandidate Laschet, Scholz a Baerbock. Dobäi goung et ënner anerem ëm de Mindestloun, d'Sécherheet am Land an de Klimaschutz.

No de leschte Sondagë läit d’SPD weider virun der CDU an deene Gréngen. Bei der Fro iwwert méigleche Koalitioune wëll den Olaf Scholz d'Unioun an Oppositioun schécken. Hien hätt am léifsten eng Koalitioun mat deene Gréngen. Déi Gréng an d'SPD ware sech dann och bei villen Themen eens, zu Beispill beim Mindestloun vun 12 Euro.

Den Armin Laschet wëll iwwerdeems méi streng géinnt Terrorismus a Clan-Kriminalitéit virgoen. Hie sot: „Wie kriminell gëtt, muss zréck a seng Heemecht geschéckt ginn“. A sengem Schluss-Statement steet hien dann och „fir eng kloer Linn an de banneschter Sécherheet“.

Och de Klimaschutz ass vun deene groussen Themen an dësem Walkampf. D'Annalena Baerbock gesäit d'Bundestagswal als richtungsweisend fir d'Klimapolitik. Et géinge just zwou Alternative ginn: Keng hallef Saache méi oder dat Weider esou vun der sougenannter GroKo.

Fir d’Zuschauer ass kloer: Den Olaf Scholz vun der SPD hätt hinnen no den Triell gewonnen. No de leschten Ëmfroe géing ronn een Drëttel vun de Wieler hien als Kanzler wielen. D’Annalena Baerbock an den Armin Laschet leie gläich op bei 12%.

Mat der AfD wéilt iwwregens keng aner Partei eng Regierung bilden.