Wéi e Méindeg de Moien de Buedem zu Heraklion gewackelt huet, ass op d'mannst eng Persoun dobäi ëmkomm an eelef Mënsche blesséiert ginn.

Kuerz no 9 Auer gouf an der Hafestad Heraklion op Kreta en Äerdbiewe vun der Stäerkt 5,8 gemooss. D'Mënsche sinn aus hiren Haiser op d'Stroosse gelaf. Op d'mannst 1 Mann ass ëm d'Liewe komm, wéi eng Kierch zu Arkalochori agestierzt ass. Informatioune vun de Katastropheschutzautoritéiten no ginn et op d'mannst 11 Blesséierter.

Den Epizentrum war ronn 23 Kilometer südëstlech vun der Stad an enger Déift vun zéng Kilometer. Opname weisen agestierzte Gebaier zu Arkalochori an a sëllegen Dierfer ronderëm Heraklion. Och op aneren Insele war d'Biewen ze spieren.