Mat dësem Verbuet wëll déi franséisch Regierung de Plastikknascht verréngeren.

Vun nächstem Joer u wäert ee bei eise franséischen Noperen eng Partie Uebst- a Geméiszorten net méi a Plastiksverpackungen ze kafe kréien. Dat huet den Ëmweltministère e Méindeg annoncéiert. Zil ass et, dass pro Joer 1 Milliard Verpackunge manner am Ëmlaf sinn.

Ënnert anerem Kornischongen, Muerten, Gromperen, Courgetten, Poretten, Äppel, Bieren an Orangë wäerte just nach ouni Plastiksverpackung an de Butteker verkaf ginn.

Schätzungen no ginn den Ament 37% vum Uebst a Geméis a Frankräich a Verpackungen ugebueden. Mam Verbuet, dat 2022 a Kraaft trëtt, solle pro Joer 1 Milliard Plastiksverpackunge manner zirkuléieren. Bis 6 Méint nom Stéchdag (1. Januar 2022) dierfen nach Reschtbestänn a Plastik verkaf ginn, duerno ass Schluss. No an no solle weider Produite vun dësem Plastik-Verbuet betraff sinn. Grousst Zil vun der franséischer Regierung ass et, dass vun 2026 u guer keen Uebst a Geméis méi a Plastik verpak a verkaf gëtt.