Déi wichtegst Industrielänner a Vertrieder vun der EU diskutéieren en Dënschdeg d'Lag am Afghanistan an an den Nopeschlänner.

D'EU-Kommissiounspresidentin Ursula von der Leyen huet zousätzlech finanziell Hëllefe fir Afghanen an d'Nopeschlänner vum Afghanistan annoncéiert. Am Ganze wäerten 1 Milliard Euro zur Verfügung stoen, gouf op der Videokonferenz vun de G20-Länner matgedeelt. Et misst een alles maachen, fir e schwéieren humanitären a sozioekonomeschen Zerfall am Afghanistan ze verhënneren, sou d'Ursula von der Leyen.

Zu den 300 Milliounen Euro fir humanitär Hëllef, déi schonn zougesot goufen, kommen nach emol op d'mannst 250 Milliounen Euro fir Gesondheetsschutz dobäi. De Rescht vun der Zomm soll un d'Nopeschlänner goen, déi Leit opgeholl hunn, déi aus dem Afghanistan geflücht sinn.

Donieft huet d'von der Leyen betount, dass déi klassesch Entwécklungshëllef, fir den Afghanistan nees opzebauen, den Ament net ausbezuelt gëtt. D'Sue sollen eréischt nees fléissen, wann d'Taliban zum Beispill d'Fraerechter anhalen, d'Mediefräiheet garantéieren an eng Regierung bilden, déi déi ethnesch a reliéis Vilfalt vum Land representéiert.

Donieft wäert um G20-Sommet doriwwer berode ginn, wéi een an Zukunft mat den Taliban ëmgeet.