An der norwegescher Stad Kongsberg huet e Mëttwochowend e Mann mat Feil a Bou Mënschen ëmbruecht a blesséiert. De presuméierten Täter gouf festgeholl.

Wéi d'Police e Mëttwoch den Owend matgedeelt huet, huet e Mann an der norwegescher Stad Kongsberg mat Feil a Bou op Mënsche geschoss. Beim Amoklaf si fënnef Persounen ëm d'Liewe komm an et gouf zwee Blesséierter. Ënnert de Blesséierte wier och ee Polizist, deen zum Ament vun der Dot net am Asaz war.

Géint 18.30 Auer war et am Zentrum vun der Stad Kongsberg zu der Dot komm. D'Stad läit ronn 80 Kilometer südwestlech vun Oslo. Wéi d'Chaîne NRK gemellt huet, soll de presuméierten Täter ënnert anerem an engem Supermarché ëm sech geschoss hunn.
Et gëtt Indicen, datt de presuméierten Täter sech kéint radikaliséiert hunn, huet et den Donneschdeg de Moie vun den norwegeschen Autoritéite geheescht. De Mann wier vun norwegescher Police schonn d'lescht Joer dowéinst kontaktéiert ginn. De Mann wier virdrun zum Islam konvertéiert. Dem virleefegen Ermëttlungsstand vun der Police no géing et sech bei der Dot ëm ee presuméierten "Terrorakt" handelen.

No der grujeleger Attack an Norwegen huet de Verdächtege mat der Police geschwat an d'Dot zouginn. Wéi et heescht wéilt hie mat der Police zesumme schaffen. Et handelt sech ëm e 37 Joer alen Dän.

De Police-Chef vu Kongsberg Øyvind Aas sot am Laf vum Mëttwochowend, datt sech de Mann wärend der Dot duerch e méi grousst Gebitt am Zentrum vu Kongsberg mat Geschäfter an Haiser beweegt hätt. D'Situatioun wär ganz oniwwersiichtlech. D'Police wär mat ville Leit am Asaz an hätt och Ënnerstëtzung aus aneren Distrikter kritt.

RTL

De Police-Chef vu Kongsberg Øyvind Aas. / © AFP (Archiv)

De presuméierte Mann wär ronn 30 Minutten no den éischte Meldungen an der Géigend vun den Attacke festgeholl an op e Kommissariat an der Nopeschstad Drammen bruecht ginn, sou den Aas. "Eisen aktuellen Informatiounen no huet hien d'Dot eleng ausgefouert." No weidere Verdächtege géing net gesicht ginn. Et géif vill Zeie ginn, déi elo emol misste gehéiert ginn, a Spueren, déi ee misst sécheren, sou de Police-Chef weider.

Norwegen war an der Vergaangenheet schonn e puer Mol d'Zil vu rietsextremen Attacken. Den 22. Juli 2011 hat de Rietsextremist Anders Behring Breivik 77 Mënschen zu Oslo an op der Insel Utöya ëmbruecht. Am August 2019 gouf et een Attentat op eng Moschee um Bord vun Oslo. Verantwortlech war hei de Philip Manshaus.

RTL

© AFP