Wéi et aus Sécherheetskreesser heescht, hätt eng arméiert Band e Samschdeg d'Leit an engem Viruert vu Port-au-Prince entfouert.

An Haiti goufen op d'mannst 17 US-amerikanesch Missionare respektiv hir Familljemembere gekidnapped. Ënnert den entfouerte Persoune sinn och Kanner. Och eng onbestëmmt Zuel un haitianesche Staatsbierger soll beim Iwwerfall vun der Grupp "400 Mawozo", déi zanter Méint hiert Onwiesen an der Regioun dreift, entfouert gi sinn.

D'Missionaren an hir Famillje wäre vun engem Besuch an engem Kannerheem knapp 30 Kilometer ëstlech vun der haitianescher Haaptstad zeréckkomm, wéi d'Täter zougeschloen hunn an d'Mënschen an hiren Autoen gekidnapped hunn, heescht et aus Sécherheetskreesser.

Wat d'Kidnapper verlaangen an ob Léisegeld gefrot gouf, ass onkloer.

Am politeschen a soziale Chaos an Haiti hu kriminell Banden nach u Muecht gewonnen. Dëst Joer goufen tëscht Januar a September schonn iwwer 600 Entféierunge registréiert, par Rapport zu 231 an der selwechter Zäit 2020. Dat geet aus den Date vum Zentrum fir d'Analys an Erfuerschung vu Mënscherechter ervir.