Grouss Opreegung en Donneschdeg den Owend méi spéit, nodeems bekannt gouf, dass déi 95 Joer al Queen huet missen an d'Spidol.

A Groussbritannien gëtt sech Suergen ëm d’Queen gemaach.

Déi huet des Woch eng Nuecht am Spidol musse verbréngen, huet de Buckingham Palace en Donneschdeg den Owend confirméiert, an awer och gesot dass et der Monarchin nees gutt géif goen.

Ufanks der Woch hat déi mëttlerweil 95-Jähreg och eng Visitt a Nordirland mussen op Urode vun hiren Dokteren, ofsoen.

Grouss Kritik u Kommunikatioun

Dass déi 95 Joer al Monarchin an der Nuecht op en Donneschdeg am Spidol war, am Virfeld awer just gemellt gi war, dass eng Visitt an Nordirland huet missen ofgesot ginn, suergt elo fir hefteg Kritik. De Buckingham Palace géif net genuch kommunizéieren, heescht et vun de Medien. Um Enn huet et jo och just geheescht, d'Queen wier "an enger gudder Stëmmung". Grënn, wisou déi brittesch Kinnigin am Spidol war, goufen net genannt.

De Fait, dass de Buckingham Palace de Spidolsopenthalt iwwerhaapt matgedeelt huet, wier op e Bericht an der Boulevardzeitung "The Sun" zeréckzeféieren. Och am Palais selwer hätte sech Leit gewonnert a sech Froe gestallt.

Fir d'lescht war d'Queen 2013 wéinst engem Mo-Daarm-Virus am Spidol. U sech ass déi déngschteelst Monarchin nämlech fir hire robuste Gesondheetszoustand bekannt. An de leschte Woche war si allerdéngs mat enger Krätsch gesi ginn. Och do hat de Buckingham Palace verséchert, dass si keng gesondheetlech Problemer hätt.

Et muss een dobäi och wëssen, dass d'Queen et absolut haasst, wann d'Leit ze vill Gedeessems ëm si mécht, besonnesch am Hibléck op hir Gesondheet.