E Mann war virun engem Joer duerch d'Foussgängerzon zu Tréier gerannt an hat geziilt Mënschen ugestouss.

Bal ee Joer no der Amokfaart zu Treier gëtt et e sechst Doudesaffer. En deemools schwéier blesséierte 77 Joer ale Mann ass e Freideg gestuerwen. Seng Fra war deemools den 1. Dezember zejoert bei der Attack ëm d'Liewe komm. De Buergermeeschter vun Tréier, de Wolfram Leibe, huet dat e Méindeg de Moie confirméiert.

De Mann war laang an der Klinik an eréischt rezent aus der Reha erauskomm. E puer Deeg drop hat hien allerdéngs e Réckfall an ass op en Neits hospitaliséiert ginn. Vun de Suitte konnt hie sech net erhuelen.

Bei der Amokfaart waren deemools 5 Mënschen ëm d'Liewe komm an zeg blesséiert ginn.