Déi nei Variant B.1.1.529 vum Coronavirus gouf als éischt an Europa an der Belsch nogewisen.

D'Weltgesondheetsorganisatioun analyséiert  déi nei Corona-Variant B.1.1.529. Dobäi gëtt och ënnersicht, wéi eng Auswierkungen d'Variant op d'Diagnostik, Therapien an d'Impfcampagnen huet. D'WHO huet fir déi ënnerschiddlech Varianten e puer Kategorien. E Freideg den Owend huet d'WHO déi nei Variant als "besuergneserreegend" agestuuft.

D'WHO recommandéiert de Länner awer, "weiderhin eng risikobaséiert a wëssenschaftlech Approche beim Verhänke vu Reesaschränkungen unzewennen", sou de WHO-Spriecher Christian Lindmeier zu Genf.

E Freideg am spéiden Owend huet sech och d'EU-Gesondheetsautoritéit zur neier Variant geäussert. B.1.1.529 wär vun de Varianten, déi bis ewell entdeckt gi sinn, déi Variant, déi déi gréisste Verännerunge géing opweisen, sou d'ECDC. Et mécht ee sech dowéinst grouss Suergen, datt d'Wierksamkeet vun de Corona-Impfstoffer däitlech fale kéint an de Risiko vu Reinfektioune klamme géif.

Länner schränke Fluchverkéier an

D'EU-Kommissioun huet da wéinst der neier Variant de Memberstaaten eng provisoresch Aschränkung vum Reesverkéier mat de Länner am südlechen Afrika proposéiert.

Däitschland huet e Freideg de Fluchverkéier mat Südafrika agestallt. D'Land gëllt vun der Nuecht op e Samschdeg un als Virus-Variantegebitt. Fluchgesellschaften dierfen deemno däitsch Staatsbierger nëmmen nach an Däitschland fléien. Dës mussen da fir 14 Deeg a Quarantän, och wa se vollstänneg geimpft sinn.

Wéi den däitsche Gesondheetsministère matdeelt, kéint déi nei Astufung méiglecherweis och Nopeschlänner vu Südafrika betreffen. Well déi nei Virus-Variant de Länner Suerge mécht, géif ee lo "pro-aktiv a fréizäiteg handelen", fir ze verhënneren, datt "eng nei Variant an d'Land bruecht gëtt, déi nach méi Probleemer mécht".

Lëtzebuerg huet e Freideg den Owend och reagéiert. Vun e Samschdeg u gëlle Restriktioune fir Leit, déi aus engem Land am Süde vun Afrika op Lëtzebuerg reesen.

Éisträich, Tschechien an Italien schränken d'Areesen aus dem südlechen Afrika och an. Den éisträichesche Gesondheetsministère huet matgedeelt, datt nëmmen nach Éisträicher, déi sech a Südafrika, Namibia, Botsuana, Simbabwe a Mosambik opgehalen hunn, an hir Heemecht zréckfléien dierfen, mussen awer an eng besonnesch streng Quarantän. An Italien dierf da keen areesen, deen an de leschte 14 Deeg a Südafrika, Lesotho, Botsuana, Simbabwe, Mosambik, Namibia an Eswatini war.

D'Schwäiz huet e Freideg den Owend all direkt Flich aus dem Süde vun Afrika op onbestëmmt Zäit verbueden. Bei Areesen aus der Regioun Südafrika, aus Hongkong, Israel an der Belsch mussen d'Leit een negative Corona-Test virweisen a fir zéng Deeg a Quarantän goen.

Donieft hunn d'USA vun e Méindeg u Restriktioune fir de Fluchverkéier aus 8 afrikanesche Länner decidéiert. Singapur huet eng Aschränkung vum Fluchverkéier mat siwen afrikanesche Länner ugekënnegt. Japan huet decidéiert, d'Kontrolle fir Leit, déi aus Südafrika a véier weideren afrikanesche Länner areesen, méi streng ze maachen. Och Malta huet wéinst de Suerge vun der Ausbreedung vun der neier Variant eng Reeslimitatioun fir sechs afrikanesch Länner verhänkt. Vu Mëtternuecht an der Nuecht vun e Samschdeg op e Sonndeg u si Reese vun an a Südafrika, Namibia, Lesotho, Botswana, Eswatini a Simbabwe ënnersot.

Länner wéi Groussbritannien an Israel hate schonn um Donneschdeg ugekënnegt, de Fluchverkéier vun an a Südafrika, Lesotho, Botswana, Simbabwe, Mosambik, Namibia an Eswatini anzestellen. Reesender, déi bis dohin nach aus engem vun dëse Länner a Groussbritannien ukommen, mussen a Quarantän an den zweeten an aachten Dag ee PCR-Test maachen. An Israel dierfen afrikanesch Touriste guer net areesen, Israeelien, déi zréckkommen, musse bis zu 14 Deeg a Quarantän, kënne sech awer no enger Woch mat zwee negative PCR-Tester "fräitesten".

Éischten Noweis an Europa

Wéi d'Noriichtenagence Bloomberg mellt, wier d'Variant B.1.1.529 dann och an Europa ukomm. Dat huet de belsche Gesondheetsminister bei enger Pressekonferenz e Freideg matgedeelt. Eng ongeimpfte Persoun, déi aus dem Ausland ukomm wier, ass positiv op déi nei Variant getest ginn.

Domat ass déi nei Variant och elo an Europa ukomm.

De belsche Premierminister Alexander De Croo huet Reesaschränkunge fir Mënschen, déi aus Länner am südlechen Afrika ureesen, annoncéiert. Et wier Virsiicht néideg, awer keng Panik, sou nach de Vandenbroucke.

E Freideg goufe fir d'Belsch jo verschäerfte Mesuren annoncéiert, ënner anerem mussen d'Discoen vun e Samschdeg un nees hir Diere fir 2 Wochen zoumaachen Fir Caféen a Restaurante gëllt e Couvre feu.

Éischten Noweis an Israel

An Israel ass dann eng Persoun identifizéiert ginn, déi sech mat der neier südafrikanescher Variant infizéiert huet. Zwou weider Persoune wieren da Verdachtsfäll, déi nach op hir Testresultater waarden, awer de Moment schonn a Quarantän sinn. Dat deelt den israelesche Gesondheetsministère mat.

Déi infizéiert Persoun wier aus Malawi zréck an Israel gereest, déi aner zwee wieren och aus dem Ausland rëmkomm. All dräi Persoune wiere geimpft, hire geneeë Status gëtt de Moment nach iwwerpréift. Donieft gëtt dann och no de Kontakter gesicht.

Europäesch Bourssen agebrach

Den Dax op der Frankfurter Bourse huet nom Handelsstart e Freideg knapp 3,2 Prozent verluer, zu Paräis ass de Leetindex CAC 40 kuerz no der Ouverture ëm 4,4 Prozent agebrach an zu London louch d'Handelsplaz 3,3 Prozent am Minus. Do virdrun hate schonn déi asiatesche Boursse mat engem däitleche Minus ofgeschloss.

D'Suerg op de Finanzplaze wiisst, nodeems a ville Länner de Fluchverkéier mat Südafrika ageschränkt gëtt. Och d'EU-Kommissioun hat jo proposéiert, de Reesverkéier mat de Länner aus dem Süde vun Afrika zäitweis auszesetzen.

Nieft de Bourssen huet och den Uelegpräis sensibel op déi nei Entwécklunge vum Coronavirus reagéiert. De Präis vun der Zort WTI (West Texas Intermediate) huet 5,4 Prozent verluer an ass op 73,89 Dollar (ëmgerechent 65 Euro) pro Barrel gefall. E Barrel vun der Nordséi-Zort Brent huet e Freideg de Moien 78,22 Dollar kascht, en Abroch vu 4,9 Prozent. Ee Barrel entsprécht 159 Liter.