E Mëttwoch ass et genee ee Joer hier, datt zu Tréier e Mann mat sengem Auto duerch d'Foussgängerzon gerannt ass an dobäi fënnef Leit ëmbruecht huet.

Ënnert den Affer waren och ee just néng Wochen ale Bëbee a säi 45 Joer ale Papp. Ee 77 Joer ale Mann, dee bei der Amokfaart seng Fra verluer hat a selwer schwéier blesséiert gouf, ass eréischt virun e puer Woche gestuerwen. D'Dot, déi just ronn véier Minutte gedauert huet, huet vill blesséiert an traumatiséiert Leit zeréckgelooss.

E Mëttwoch ëm genee 13.46 Auer - an där Minutt, an där déi déidlech Faart d'lescht Joer lass gaangen ass - huet d'Stad Tréier den Affer geduecht a wärend véier Minutte goufen d'Klacke gelaut. Och eng Gedenkzeremonie am Zentrum vun der eelster Stad an Däitschland, wou dat ëffentlecht Liewen du fir eng Zäit Stëll stoung, war e Mëttwoch am Nomëtteg. Am Tréierer Doum gouf et eng Mass. D'lescht Woch war un der Porta Nigra eng Gedenktafel ageweit ginn.

Zanter August steet den 52 Joer ale presuméierten Täter viru Geriicht, hien huet bis ewell awer nach keng Aussoe gemaach. Am Prozess muss gekläert ginn, ob hien iwwerhaapt voll scholdfäeg ass.