An der lescht géif him d'"Begeeschterung" fir d'Politik feelen. Eegenen Aussoen no hätt de Schrëtt awer näischt mat den Enquêtë géint hien ze dinn.

De fréiere Bundeskanzler vun Éisträich Sebastian Kurz hat zu Wien säi Récktrëtt aus der Politik ugekënnegt. Domat huet hie säi Posten als Parteipresident vun der ÖVP an als Fraktiounschef am Nationalrot - dem éisträichesche Parlament - ofginn.

Eegenen Aussoen no wier seng "Begeeschterung" fir d'Politik an de leschte Wochen a Méint duerch "d'Accusatiounen an d'Ënnerstellungen" ëmmer méi zréckgaangen. Zanter Oktober steet de Sebastian Kurz wéinst Ermëttlunge vum Wirtschafts- a Korruptionsparquet ënner Drock. Am Oktober war hien dowéinst schonn als Regierungschef zréckgetrueden, nodeem déi Gréng domat gedrot haten, d'Koalitioun mat der ÖVP opzeléisen. Mëtt November huet den Nationalrot dann d'Immunitéit vum Politiker opgehuewen an domat de Wee fir weider Ermëttlunge fräigemaach.

Et wier awer d'Gebuert vu sengem Bouf, déi hien endgülteg dozou bruecht huet der Politik de Réck ze kéieren. "Zéng Joer hätt hien d'Republik iwwer bal alles gestallt" a fir Famill a Privates bal keng Zäit gelooss. "Bei der Gebuert vu sengem eegene Kand" wier him bewosst ginn, wéi vill "Schéines a Wichteges" et ausserhalb vun der Politik géif ginn.

RTL

De fréiere Bundeskanzler Sebastian Kurz virun der Press den 2. Dezember. / © AFP/Joe Klamar